ترەمپ قوتابیانی نێودەوڵەتیی زانکۆی هارڤارد دەردەکات

ئاڤا نیوز

وەزارەتی ئاسایشی ناوخۆی ئەمریکا ڕایگەیاند: ئیدارەی ترەمپ بەشێوەیەکی فەرمی مۆڵەتی زانکۆی هارڤاردی بۆ تۆمارکردنی قوتابیانی نێودەوڵەتیی هەڵوەشاندووەتەوە.

 

چیرۆکی سەرەکی: ئیدارەی ترەمپ، زانکۆی هارڤارد بە هاندانی ڕەفتاری دژە جوو تۆمەتبار دەکات، ئەمەش لەبەرئەوەی ڕێگەی داوە قوتابیانی زانکۆکە لە دژی هێرشەکانی ئیسرائیل بۆ سەر غەززە و کوشتنی خەڵکی مەدەنی لەلایەن سوپای ئیسرائیلەوە ناڕەزایی دەرببڕن. 

ڕاگەیێنراوی فەرمی: بەگوێرەی ڕاگەیێنراوەکە زانکۆی هارڤارد چیدی بۆی نییە قوتابی نێودەوڵەتیی وەربگرێت و دەشبێت ئەو قوتابییە نێودەوڵەتییانەی کە ئێستا لەو زانکۆیە دەخوێنن یان بۆ زانکۆکانی دیکە بگوازرێنەوە یان لە ئەمریکا دەربکرێن.

بۆچوونی لایەنی بەرامبەر: زانکۆی هارڤارد لە ڕاگەیێنراوێکدا ئەم بڕیارەی بە نایاسایی و بە هەنگاوێكی تۆڵەسەندنەوە ناوبردووە و ڕایگەیاندووە کە زیانی جددی بە زانکۆ و وڵات دەگەێنێت و کاریگەریی نەرێنی لەسەر لایەنی زانستی و توێژینەوەی زانکۆکە دەبێت.

ئەوەی پێویستە بیزانیت: زیاتر لە شەش هەزار و 800 قوتابی نێودەوڵەتیی لە زانکۆی هارڤارد ناونووس کراون کە زیاتر لە یەک لە سەر چواری کۆی قوتابییانی زانکۆکە پێکدێنن. هارڤارد کۆنترین زانکۆی ئەمریکایە و لە سەر ئاستی جیهان لە زانکۆ یەکەمینەکانە.