چوارچێوەی هەماهەنگی لەچەند پارێزگایەک بە یەک لیست بەشداری لە هەڵبژاردن دەکات

ئاڤا نیوز

چوارچێوەی هەماهەنگی بڕیاریدا لەچەند پارێزگایەکی عێراق بە یەک لیست بەشداری لە هەڵبژاردنی داهاتووی پەرلەمانی عێراق بکەن و دوای هەڵبژاردنیش جارێکی دیکە هاوپەیمانێتی پێکبێننەوە.

چیرۆکی سەرەکی: ئێوارەی ئەمڕۆ دووشەممە 26-5-2025، سەرکردەکانی چوارچێوەی هەماهەنگی سەبارەت بەچەند پرسێک کۆبوونەوە و تاوتوێی شێوازی بەشداریکردنی هەڵبژاردنی پەرلەمانیان کرد و بڕیاریاندا، لە چەند پارێزگایەکی عێراق بەیەک لیست بەشداری بکەن.

ڕاگەیێنراوی فەرمی: چوارچێوەی هەماهەنگی لە بەیاننامەیەکدا ڕایگەیاند: لەپێناو بەرژەوەندی گشتی،  چوارچێوەی هەماهەنگی بڕیاری دا لەپارێزگاکانی دیالە و سەڵاحەددین و نەینەوا بەیەک لیست بەشداری هەڵبژاردنی پەرلەمانی عێراق بکەن.

ئەوەی پێویستە بیزانیت: پێشتر هێزە سیاسییەکانی پێکهێنەری هاوپەیمانیی چوارچێوەی هەماهەنگی بڕیاریاندا هەر یەکەو بە لیستی جیا بەشداری لە هەڵبژاردنی داهاتووی پەرلەمانی عێراق بکەن و دوای هەڵبژاردن هاوپەیمانێتییەکە پێکبێننەوە.  

ئەوەی پێویستە بیزانیت: بریارە ڕۆژی 11-11-2025، هەڵبژاردنی خولی شەشەمی پەرلەمانی عێراق بەڕێوەبچێت، کۆمیسیۆنی باڵای هەڵبژاردنەکانیش هەموو ڕێکارەکانی گرتووەتەبەر پاڵپشت بە یاسای هەڵبژاردنەکانی ژمارە 12ـی ساڵی 2018 کە عێراق بەسەر 18 بازنەی هەڵبژاردن دابەش دەکات.