قوتابیانی کوردی کۆلێژی سەربازیی ناسرییە دەگوازرێنەوە بۆ کوردستان

ئاڤا نیوز

دوای رووداوی گیان لەدەستدانی دوو قوتابی، خولی قوتابیانی کورد لە کۆلێژی سەربازیی ناسرییە دەگوازرێنەوە بۆ کوردستان.

چیرۆکی سەرەکی: لە ڕۆژانی ڕابردوو دوو قوتابیی كۆلێژی سەربازیی ناسرییە لەكاتی مەشق و ڕاهێنانی سەخت گیانیان لەدەست دا، نزیکە 70ـی دیکەش ڕەوانەی نەخۆشخانە کران، لە خولە سەربازییەکە مەشق و ڕاهێنانی سەخت هەیە، كەمتەرخەمی هەیە، مامەڵەیان خراپە لەگەڵ قوتابییەکان.

لەم خولە سەربازییە كە خولی 89ـیە، دەیان قوتابیی كورد هەن و هەوڵێك هەیە بیانگەڕێننەوە بۆ كۆلێژی سەربازی دوو لە زاخۆ و كۆلێژی سەربازیی سێ لە سلێمانی.

لێدوانی فەرمی: سەگڤان یوسف، جێگری سەرۆکی لیژنەی ئاسایش و بەرگریی پەرلەمانی عێراق بە ئاڤای گوتووە: نزیکەی هەفتەیەک دەبێت کار لەسەر ئەوە دەکەین ڕەزامەندی وەزارەتی بەرگریی و ئەکادیمیای سەربازی عێراق وەربگرین، تاوەکو ئەو کوردانەی لە  کۆلێژی سەربازی ناسرییە وەرگیراون و ژمارەیان نزیکەی 60 کەسە، بیانگەڕێنینەوە بۆ کۆلێژی سەربازی دوو لە زاخۆ و کۆلێژی سەربازی سێ لە سلێمانی.

زانیاریی زیاتر: بە وتەی سەگڤان یوسف، ڕەزامەندیی چەند لایەنێكیان وەرگرتووە و شەممەی داهاتوو نووسراوی فەرمی دەكەن بۆ گواستنەوەی ئەو قوتابییە كوردانە.

بەدواداچوونی ئاڤا: دەنگۆی ئەوە هەبوو كە قوتابییەكی كوردیش لە كۆلێژەكە بەهۆی ناجێگیریی دۆخی تەندروستییەوە گیانی لەدەست دابێت، ئاڤا پەیوەندی بە دکتۆر زەید عەلی بەڕێوەبەری گشتیی فەرمانگەی پزیشکی دادی عێراقەوە کرد، رەتی کردەوە هیچ گیانلەدەستدانێکی نوێ لە کۆلێژەکە تۆمار کرابێت.

ئاڤا بەدواداچوونی زیاتری كرد و پەیوەندی بە نەخۆشخانەی گشتیی ناسرییەوە کرد، حوسێن خەفاجی، گوتەبێژی تەندروستیی زیقار گوتی: سەرجەم قوتابییەکان لەدوای وەرگرتنی چارەسەری پێوسیت نەخۆشخانەیان جێهێشتووە، تەنیا قوتابییەك نەبێت لە نەخۆشخانە ماوە و دۆخی تەندروستیی ناجێگیرە.