عێراق: 17 هەزار حەجخواز لە ڕێگەی گەشتی ئاسمانی گواستراونەتەوە سعوودیە

ئاڤا نیوز

وەزارەتی گواستنەوەی عێراق ڕایدەگەیێنێت، لە ڕێگەی 105 گەشتی ڕاستەخۆی ئاسمانییەوە زیاتر لە 17 هەزار حەجخواز بۆ سعوودیە گواستراونەتەوە.

وێنە گەورەکە: ماوەی چەند رۆژێکە حەجخوازن لە هەردوو شاری مەدینە و مەککە دەستیان کردووە بە ئەنجامدانی فەریزەی حەج و ڕۆژی 5ـی حوزەیران حەجخوازن دەچنە سەر کێوی عەرەفە، بەمەش کۆتایی بە فەریزەی حەج دەهێنن و دەبن بە حاجی، ڕۆژی 6ـی حوزەیرانیش یەکەم ڕۆژی جەژنی قوربان دەبێت و حاجییان قوربانی دەکەن.

ڕاگەیێنراوی فەرمی: بەگوێرەی ڕاگەیێنراوی وەزارەتی گواستنەوەی عێراق، لە 4 تاوەکو 28ـی ئەم مانگە هێڵی ئاسمانی عێراق لەڕێگەی فڕۆکەخانەکانی بەغدا و هەولێر و فڕۆکەخانەکانی دیکە لە ڕێگەی 105 گەشتی ڕاستەخۆوە  بۆ سعوودیە، زیاتر لە 17 هەزار حەجخواز بۆ ئەو وڵاتە گواستراونەتەوە.

لەلایەکی دیکەوە: ڕۆژی 25ـی ئایار، دەستەی حەج و عومرەی عێراق بڵاویکردەوە، کۆتا پاسی گواستنەوەی حەجخوازان لە ڕێگەی وشكانییەوە گەیشتنە شاری مەدینە، بەوەش لە ماوەی 10 ڕۆژدا سەرجەم حەجخوازانی ڕێگای وشکانی لە عێراق و هەرێمی کوردستانەوە گەیێنرانە سعوودیە.

ئەوەی پێویستە بیزانیت: ئەمساڵ لە هەرێمی کوردستان، پێنج هەزار و 136 حەجخواز گەشتی سعوودیەیان کردووە، لەو ژمارەیە هەزار و 440 کەسیان بەڕێگای وشکانی بووە.