پڕۆژەی ئاوی گۆپتەپە – چەمچەماڵ دەستپێدەکاتەوە

ئاڤا نیوز

 

دوای نزیکەی 20 ڕۆژ لە وەستاندنی، پڕۆژەی ئاوی گۆپتەپە – چەمچەماڵ دەستپێدەکاتەوە و بڕیارە مانگانە پارەی بۆ خەرج بکرێت.

 

وێنە گەورەکە: پڕۆژەی ئاوی گۆپتەپە – چەمچەماڵ، یەکێکە لە پڕۆژە ستراتیژییەکانی کابینەی نۆیەمی حکومەتی هەرێمی کوردستان، مانگی هەشتی 2024 کارکردن لە پڕۆژەکە دەستیپێکرد، بەڵام ئەو کۆمپانیایەی کاری لە پڕۆژەکە دەکرد بەهۆی بەردەست نەبوونی بودجە کارەکانی ڕاگرت.

 

لێدوانی فەرمی: ئەندازیار شێروان جەمال، بەڕێوەبەری بەڕێوەبەرایەتیی ئاوی دەورووبەری سلێمانی بە ئاڤای گوت، "بڕیارە ئەمڕۆ کۆمپانیاکە دەست بە کارەکانی بکاتەوە و مانگانەش بەردەوام  پارەکەی بۆ خەرج  بکرێت، ئەگەر کارەکانی نەوەستن لەماوەی دوو ساڵدا تەواو دەبێت.

 

ئەمەش بزانە: گوژمەی پڕۆژەی ئاوی گۆپتەپە – چەمچەماڵ، 78 ملیۆن دۆلارە. لە یەک کاتژمێردا توانای بەرهەمهێنانی سێ هەزار و 400 مەتر سێجا ئاوی هەیە و زیاتر لە 480 هەزار کەس لێی سوودمەند دەبێت، پڕۆژەکە بەجۆرێکە کێشەی کەمئاوی لە چەمچەماڵ چارەسەر دەکات.