یەکێتیی ئەوروپا سزاکانی سەر هێڵی ئاسمانی عێراق درێژ دەکاتەوە

ئاڤا نیوز

بۆ جاری یازدەیەم، یەکێتیی ئەوروپا سزاکانی سەر هێڵی ئاسمانی عێراقی بۆ وڵاتانی ئەوروپا درێژکردەوە و لیژنەی گواستنەوە و گەیاندنی پەرلەمانی عێراقیش هۆکارەکەی دەخاتەڕوو.

وێنە گەورەکە: بەهۆی پابەندنەبوون بە مەرجەکانی سەلامەتی و پێوەرەکانی فڕۆکەوانی مەدەنی و خراپی ژێرخانی فڕۆکەخانەکان، یەکێتیی ئەوروپا یازدە ساڵە سەرجەم گەشتەکانی هێڵی ئاسمانی عێراقی بۆ وڵاتانی ئەوروپا قەدەغە کردووە.

لێدوانی فەرمی: کاروان یاروەیس، ئەندامی لیژنەی گواستنەوە و گەیاندنی پەرلەمانی عێراق ڕایگەیاند: یەکێتیی ئەوروپا دەرفەتێکی زۆری بە عێراق داوە تاوەکو چاکسازی لە هێڵی ئاسمانی عێراق بکات و مەرجەکانی یەکێتیی ئەوروپا جێبەجێ بکات، بەڵام تاوەکو ئێستا دەسەڵاتدارانی فڕۆکەوانی عێراق پابەندی ڕێنماییەکانی یەکێتییەکە بۆ ئەو پرسە نەبوونە .

لەلایەکی دیکەوە: بەپێی ڕاپۆرتی پشکنەرە ئەوروپییەکان، عێراق هیچ گۆڕانکارییەکی بنەڕەتی لە سیستەمی فڕۆکەوانی مەدەنی خۆیدا نەکردووە، وێڕای ئەوەی حکومەتی عێراق ڕایگەیاندووە کە 71%ـی پلانی چاکسازی پەیوەست بە پابەند نەبوون بە مەرجەکانی سەلامەتی و پەرەپێدانی ژێرخانی فڕۆکەخانە و فڕۆکەکان پەسەند کردووە.

كاریگه‌ریی و لێكه‌وته‌كان: درێژکردنەوەی سزاکانی سەر هێڵی ئاسمانی عێراق لەلایەن یەکێتیی ئەوروپاوە، کاریگەریی لەسەر ناوبانگی عێراق دەبێت و گەشتیاران متمانەیان بە هێڵی ئاسمانی عێراق نامێنێت ، ئەمەش زیانێکی ماددی زۆر بە ئابووری عێراق دەگەیێنێت.