پاکستان لە دژی ئیسرائیل بەرگریی لە ئێران دەکات

ئاڤا نیوز

پاکستان هەڵوێستی وڵاتەکەی سەبارەت بە هێرشەکانی ئیسرائیل بۆ سەر ئێران ڕادەگەیێنێت و بەرگریی لە ئێران دەکات.

 

چیرۆکی سەرەکی: تەنیا لەماوەی 24 کاتژمێری ڕابردوودا ئیسرائیل و ئێران چەندین هێرشی هەمە چەشنیان کردووەتە سەر یەکتری، کە بەهۆیەوە زیانی گیانی و ماددی گەورەی بەدوای خۆیدا هێناوە، ئەم پێشهاتەش کاردانەوەی جیاوازی وڵاتانی لێكەوتووەتەوە. 

 

ڕاگەیێنراوی فەرمی: خواجە ئاسف، وەزیری بەرگریی پاکستان ڕایگەیاند، پێویستە هەموو وڵاتانی موسڵمان بۆ ڕووبەڕووبوونەوەی دووژمنکاریی ئیسرائیل یەک بگرن. گوتیشی "ئێمە بە هەموو شێوەیەک لە تەنیشت ئێران دەوەستین. ئێمە بەرژەوەندییەکانی ئێران دەپارێزین. ئێرانییەکان برای ئێمەن و خەم و ئازاری ئەوان هی ئێمەیشە."

- ئاسیف لە میانەی وتارێکیدا لە پەرلەمانی وڵاتەکەی ڕایگەیاند، ئیسرائیل لە ‌هێرشەکانیدا بۆ سەر ئێران بە تەنیا نییە، بەڵکو ژمارەیەک وڵات هاوکاریی دەکەن، بۆیە پێویستە وڵاتانی موسوڵمانیش یارمەتیی ئێران بدەن. 

- وەزیری بەرگریی پاکستان ئاماژەی بەوەش کرد "ئەمڕۆ ئیسرائیل هێرش دەکاتە سەر یەمەن، ئیران و فەلەستین. ئەگەر ئێمە هەر وا بێدەنگ و پەرتەوازە بین ئەوا ئیسرائیل هەموومان یەک لە دوای یەک دەکاتە ئامانج."