عێراق بۆ گەڕاندنەوەی هاووڵاتییانی هەماهەنگی لەگەڵ ئوردن و کوەیت و تورکیا دەکات

ئاڤا نیوز

سەرۆکوەزیرانی عێراق وەزارەتی گواستنەوەی ڕاسپاردووە بۆ ئەوەی هەماهەنگی لەگەڵ ئوردن و کوەیت و تورکیا بکات بۆ دەستپێکردنەوەی گەشتە ئاسمانییەکان.

وێنە گەورەکە: بەهۆی هێرشی مووشەکی نێوان ئیسرائیل و ئێران، بەشێکی زۆری وڵاتان گەشتە ئاسمانییەکانیان لەناوخۆ و دەرەوە ڕاگرت، بەهۆی وەستانی گەشتەکانیشەوە بەشێکی زۆر لە هاووڵاتییانی عێراقی لە وڵاتانی دیکە گیریان خواردووەو ناتوانن بگەڕێنەوە.

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، لەسەر ڕاسپاردەی محەممەد شیاع سوودانی، سەرۆکوەزیرانی عێراق وەزارەتی گواستنەوە دەستی کردووە بە کارکردنی دەستبەجێ و هەماهەنگی لەگەڵ لایەنە پەیوەندیدارەکان لە ئوردن و کوەیت و تورکیا، بۆ گەڕاندنەوەی گەشتیارانی عێراقی و ئەو کەسانەی کە گەڕانەوەیان بەهۆی داخستنی ئاسمانی عێراقەوە بەهۆی ڕووداوە ناوچەییەکانی ئەم دواییەوە ئاستەنگی بۆ دروستبووە.

لە هەمان کاتدا: هەر بە گوێرەی ڕاگەیێنراوەکە، دەستەی حەج و عومرەی عێراق لەسەر ڕاسپاردەی سەرۆکوەزیران و بە هەماهەنگی لەگەڵ وەزارەتی گواستنەوە، دەستی کردووە بە گەڕاندنەوەی ئەو حاجییە عێراقیانەی کە لە سعوودیە ماونەتەوە و دڵنیابوون لە  گەڕانەوەیان بۆ عێراق.