گەڕانەوەی ئەو عێراقییانەی لە دەرەوە گیریانخواردووە بەڕێگای وشکانی و ئاسمانی بەردەوامە

ئاڤا نیوز

وەزارەتی گواستنەوەی عێراق دەڵێت، هەوڵەکان بۆ گەڕانەوەی سەرجەم ئەو عێراقییانەی لە وڵاتانی دراوسێ و فڕۆکەخانەکانی وڵاتانی جیهان گیریانخواردووە، بەهەردوو ڕێگای ئاسمانی و وشکانیی بەردەوامە.

وێنە گەورەکە: لە ڕۆژی هەینییەوە کە هێرشە سەربازییەکانی نێوان ئیسرائیل و ئێران دەستیپێکردووە، هەزاران هاووڵاتی عێراق و هەرێمی کوردستان لە وڵاتانی دراوسێ و فڕۆکەخانەکانی وڵاتانی جیهان گیریانخواردووە، بەهۆی ئەوەی گەشتە ئاسمانییەکان بۆ فڕۆکەخانەکانی عێراق ڕاگیراون.

لێدوانی فەرمی: مەیسەم سافی، وتەبێژی وەزارەتی گواستنەوەی عێراق ڕاگەیاند، پرۆسەی گەڕانەوەی عێراقییەکان بە دوو ئاست بەردەوامە، لە ڕێگای وشکانییەوە گەڕانەوەی حاجییان لە وڵاتانی سعودییەوە بە چڕی کاری لەسەر دەکرێت و لە دوو ڕۆژی ڕابردوودا هەزاران حاجی گەڕاونەتەوە، پرۆسەکەش تا گەڕانەوەی سەرجەمیان بەردەوام دەبێت.

وتیشی، گەڕانەوەی عێراقییەکان لە وڵاتانی دراوسێش بەڕێگای وشکانی بەردەوامە و بۆ ڕێگای ئاسمانیش تەنیا فڕۆکەخانەی نێودەوڵەتی بەسڕە کراوەیە، بە بڕیاری دەسەڵاتی فڕۆکەوانی مەدەنیش گەشتەکانی فڕۆکەخانەی نێودەوڵەتی بەسڕە لە کاتژمێر 4:00ـی بەیانی ئەمڕۆوە تا کاتژمێر 10:00ـی ئەمشەو درێژکراونەتەوە.