ئێران: ئیسرائیل سەقامگیری ناوچەکەی تێکداوە

ئاڤا نیوز

وەزارەتی دەرەوەی ئێران ئاماژە بە ئیسرائیل دەکات کە بووەتە هۆکاری بۆ دروستبوونی ناسەقامگیری و ئاژاوەی ناوچەکە.

وێنە گەورەکە: جەنگی ئێران و ئیسرائیل کەوتووەتە ڕۆژی چوارەمییەوە بەهۆیەوە ئیسرائیل ژمارەیەک بەرپرسی باڵای سەربازی و زانای ئەتۆمی ئێرانی بە ئامانج گرت، تاوەکو ئێستاش هەردوولا لە هێرشکردنە سەر یەکتر بەردەوامن.

لێدوانی فەرمی: ئیسماعیل بەقائی، وتەبێژی وەزارەتی دەرەوەی ئێران ڕاگەیاند، تاوانەکانی ئیسرائیل و درێژەدان بە کردەوەکانی بووەتە هۆکاری تێکدانی ئاسایشی ناوچەکە، هاوکات ئێران لەلایەن ئیسرائیلەوە بە چەک و کەلوپەلی ئەمریکییەوە دەکرێنە ئامانج، کردەوەکانی ئیسرائیل وای کردووە ناوچەکە ببێتە شوێنی جەنگی بەردەوام''. هەر وڵاتێک پشتیگیری لە کردەوەکانی ئیسرائیل بکات، ئەوا بەشدارە لەم تاوانانە.

ژمارەکان وادەڵێن: بەهۆی ئەم جەنگەوە هەردوو لایەنی ئێرانی و ئیسرائیلی ڕووبەڕووی کوشتاری بوونەتەوە، وەزارەتی تەندروستی ئێران دەڵێت، لە سەرەتای دەستپێکردنی هێرشەکانی ئیسرائیل بۆ سەر ئێران 224 کەس کوژراون و هەزار و 277 کەسی دیکەش برینداربوون، لە نێو ئەمانە 70ـیان ئافرەت و منداڵن،  لە بەرامبەردا 16 کەسی ئیسرائیلی کوژراون و 390 کەسی دیکەش برینداربوون.