ئەندامێکی لیژنەی نەوتی پەرلەمان: گرژییە هەرێمییەکان کاریگەریی لەسەر هەناردەی نەوتی عێراق نەبووە

ئاڤا نیوز

 

ئەندامێکی لیژنەی نەوت لە پەرلەمانی عێراق دەڵێت، جەنگی نێوان ئیسرائیل و ئێران کاریگەری لەسەر هەناردەی نەوتی عێراق نەبووە و هەناردەی نەوت بەشێوەیەکی ئاسایی بەردەوامە.

 

وێنە گەورەکە: بەهۆی جەنگی نێوان ئیسرائیل و ئێران نرخی نەوت نۆ دۆلار بەرزبووەتەوە، ئەوەش بۆ عێراق کە زۆرینەی داهاتەکەی پشتی بە نەوت بەستووە بە خاڵێکی ئەرێنی دادەنرێت چونکە کاریگەریی لەسەر داهاتەکانی دەبێت.

 

لێدوانی فەرمی: شزی عەزاوی، ئەندامی لیژنەی نەوت و غاز لە پەرلەمانی عێراق ڕایگەیاند، هەناردەی نەوتی عێراق لە ناوچەکانی ململانێی نێوان ئیسرائیل و ئێران دوورە، تائێستا هیچ بە ئامانجگرتنێکی پێگە نەوتییەکانی عێراق ڕووینەداوە بۆیە هەناردەی نەوت بەشێوەی ئاسایی بە هەمان بڕ و ڕێژەی ڕۆژانی ڕابردوو، بەردەوامە.

 

- بەوتەی ئەو پەرلەمانتارە هیچ مەترسییەک لەسەر هەناردەی نەوتی عێراق بۆ دەرەوە نییە کە بکرێتە ئامانج یان زیانی پێ بگەیێنرێت، ئەویش بەهۆکاری ئەوەی عێراق خۆی لە گرژییەکان بەدوورگرتووە و ڕەتیشیکردووەتەوە ئاسمانی وڵاتەکەی بۆ هێرشکردنەسەر وڵاتانی دراوسێ بەکاربهێنرێت.