ئێران هۆشدارییەکی تووند بە ئەمریکا دەدات: بەشداریی جەنگ بکات هەموو ڕێگایەک دەگرینەبەر

ئاڤا نیوز

جێگری وەزیری دەرەوەی ئێران هۆشدارییەکی تووند بە ئەمریکا دەدات سەبارەت بە دەستوەردانی لە جەنگی نێوان وڵاتەکەی و ئیسرائیل و ڕێدەگەیێنێ، بۆ بەشداریکردن لە خۆیان هەموو ڕێگایەک دەگرنەبەر.

وێنە گەورەکە: شەڕی قورسی ئیسرائیل و ئێران حەوتەم ڕۆژە بەردەوامە و ڕۆژ لەدوای ڕۆژیش لە فراوانبوونە، مەترسی هەیە ئاگری جەنگەکە هەموو ڕۆژهەڵاتی ناوەڕاست بگرێتەوە بەتایبەت بە بەشداریکردنی ئەمریکا لە جەنگەکە، کە ئێستا جیهان چاوەڕێی بڕیاری دۆناڵد ترەمپە لەمبارەیەوە.

لێدوانی فەرمی: سەعید خەتیب زادە، جێگری وەزیری دەرەوەی ئێران لە پەیامێکدا ڕایگەیاند: " ئامۆژگاری ئەمریکا دەکەین بەشداری جەنگ نەکات، ئەگەر ئەمریکا بە هاوکاریکردنی ئیسرائیل بەشداری ئەم جەنگە بکات، ئەوا هەموو ڕێگایەک دەگرینەبەر بۆ بەرگریکردن لە خۆمان". 

ئەوەی پێشبینی دەکرێت: بەشداریکردنی ئەمریکا لەم جەنگە لە ئانوساتدایە. ڕۆژنامەی وۆڵستریت جۆرناڵی ئەمریکی بڵاوی کردووتەوە،  دۆناڵد ترەمپ، سەرۆکی ئەمریکا بە نهێنی بڕیاری بەشداریکردنی لە هێرشکردنە سەر ئێران داوە و یاریدەدەرەکانیشی لە بڕیارەکە ئاگادار کردووەتەوە، بەڵام تاوەکو ئێستا فەرمانی دەستپێکردنی هێرشەکانی دەرنەکردووە.