خاوەنی شوێنێکی بارزگانی لە کەرکووک کارمەندێکی کارەبا بریندار دەکات

ئاڤا نیوز

کارمەندێکی لقی دابەشکردنی کارەبای کەرکووک، بۆ وەرگرتنەوەی قەرزی مانگانە سەردانی شوێنێکی بازرگانی دەکات، لەلایەن خاوەنەکەیەوە بریندار دەکرێت و پۆلیس دەستی بە لێکۆڵینەوە کردووە و تەقەکەرەکە دەستگیرنەکراوە.

 

چیرۆکی سەرەکی: محەممەد سەمیر، ئەندامی کەرتی نەسرە لە لقی دابەشکردنی کارەبا کەرکووکە، ئێوارەی دوێنێ دەچێتە گەڕەکی پەنجاعەلی بەمەبەستی وەرگرتنی قەرزێکی کەڵەکەبووی شوێنێکی بازرگانی، بەڵام لەلایەن خاوەنەکەی تەقە لە قاچی دەکرێت، کارمەندەکە بریندار دەبێت و لە نەخۆشخانە لەژێر چاودێری پزیشکییە.

 

ڕاگەیێنراوی فەرمی: لقی دابەشکردنی کارەبای کەرکووک لە ڕاگەیێنراوێکدا ئیدانەی ئەم کردەوەیەی کردووە و داوا لە دەزگا ئەمنییەکان دەکات لە چوارچێوەی یاسا مامەڵە لەگەڵ تۆمەتبار بکرێت و بەسزای خۆی بگات.

 

٠ لەبەشێکی دیکەی ڕاگەیێنراوەکەدا زانیاریی سەبارەت بە دۆخی تەندروستیی کارمەندەکەیان خستووەتەڕوو، لە نەخۆشخانە نەشتەرگەری بۆکراوە و گوللـە لە قاچی دەرهێنراوە، ئێستا لەژێر چاودێریی پزیشکییە.

 

لێدوانی فەرمی: عامر نووری، وتەبێژی پۆلیسی کەرکووک بە ئاڤای گوت، "فەرمانی دەستگیکردن بۆ بکەری ڕووداوەکە دەرچووە، بەڵام خۆی ونکردووە، لێکۆڵینەوە و بەدواگەڕان بەدوایدا بەردەوام دەبێت تاوەکو دەستگیری دەکەین."