هۆشدارییەک بۆ ماسیگران؛ هەر کەسێک سەرپێچی بکات سزا دەدرێت

ئاڤانیوز

21ی ئەم مانگە ڕاوکردنی ماسی لە هەرێمی کوردستان ئاسایی دەبێتەوە و پۆلیسی دارستانیش هۆشداری دەدات بەوەی، هەر کەسێک سەرپێچی ڕێنمایی ڕاوکردنی ماسی بکات سزا دەدرێت.

وێنە گەورەکە: ساڵانە لە ماوەی دانانی گەرا کە لە سێ مانگی سەرەتای ساڵەوە تاوەکو کۆتاییەکانی مانگی شەش قەدەغەی ڕاوکردنی ماسی لە هەرێمی کوردستان ڕادەگەیێنرێت. بۆ ئەمساڵیش سبەی کۆتایی بە قەدەغەکردنەکە دێت و دوای دوو ڕۆژی تر ئاسایی دەبێتەوە.

لێدوانی فەرمی: ڕائید فوئاد ئەحمەد زراری، بەڕێوەبەری ڕاگەیاندن و مەعنەوەی لە پۆلیسی دارستان و ژینگەی هەرێمی کوردستان بە ئاڤای گوت: 21ی ئەم مانگە ڕاوکردنی ماسی ئاسایی دەبێتەوە، بەڵام دەبێت ڕاوکردنەکە بەپێی ڕێنماییەکان بێت، هەر کەسێکیش سەرپێچی بکات، بەپێی جۆری سەرپێچیەکەی بە پێبژاردن یان بەندکردن سزا دەدرێت.

ڕێنماییەکان ڕاوکردنی ماسی ئەمانەن:

- شێوازی تۆڕی ڕاوکردنی ماسی نابێت لە پێنج سانتیمەتر کەمتر بێت.

- نابێت بە ژەهر و ماددەی قڕکەر ڕاو بکرێت.

- نابێت بە چەک و تەقەمەنی ڕاو بکرێت.

- نابێت بە تەزووی کارەبا ڕاو بکرێت.

باکگراوند: ئەمساڵ بەهۆی گەرا دانان لە ڕۆژی دووشەممە 10-3-2025، قەدەغەی ڕاوکردنی ماسی چووە بواری جێبەجێکردن کە تا 20-6-2025، بەردەوام دەبێت.