ناوەندێکی مافی مرۆڤ: دەستلەکارکێشانەوەی دادوەرانی فیدراڵی هەڵبژاردنەکانی عێراق دەخاتە مەترسییەوە

ئاڤا نیوز

ناوەندێکی دیاری مافەکانی مرۆڤ لە عێراق هۆشدارییەکی تووند دەدات سەبارەت بە مەترسییەکانی قبووڵکردنی دەستلەکارکێشانەوەی دادوەرانی دادگای باڵای فیدراڵی، کە دەتوانێت ببێتە هۆی پەکخستنی هەڵبژاردنە پەرلەمانییەکەی داهاتووی وڵات و دروستبوونی "بۆشایی یاسادانان".

 

وێنە گەورەکە: ڕۆژی 19ـی حوزەیران، شەش ئەندامی سەرەکی و سێ ئەندامی یەدەگی دادگای باڵای فیدراڵیی عێراق بە کۆمەڵ دەستلەکارکێشانەوەیان خۆیان پێشکەش کرد.

 

لێدوانی فەرمی: حازم ڕدێنی، پارێزەر و سەرۆکی ناوەندی ستراتیژی بۆ مافەکانی مرۆڤ لە عێراق، بە ئاڤا میدیای ڕاگەیاند: "ناتوانرێت هەڵبژاردنە پەرلەمانییەکەی داهاتوو لە تشرینی دووەمی 2025 بەبێ بوونی ئەندامانی دادگای فیدراڵی ئەنجام بدرێت".

 

هۆکارە زانراوەکان: ڕدێنی هۆکارەکەی بۆ ئەوە گەڕاندەوە کە بەپێی دەستووری عێراقی ساڵی 2005، لە ماددەی 93، بڕگەی 7دا، بە ڕوونی ئاماژە بەوە کراوە کە "پەسەندکردنی ئەنجامە کۆتاییەکانی هەڵبژاردنی ئەنجوومەنی نوێنەران" تەنها لە دەسەڵاتی دادگای باڵای فیدراڵیدایە.

 

مەترسییە پێشبینیکراوەکان: ناوبراو ڕوونیکردەوە لە ئەگەری نەبوونی دادگاکەدا، وڵات دەکەوێتە "بۆشاییەکی یاسادانانەوە"، چونکە تەمەنی یاسایی ئەنجوومەنی نوێنەرانی ئێستا بەپێی ماددەی 49ی دەستوور، لە 25ی تشرینی دووەمی 2025 کۆتایی دێت و دوای ئەو ڕێککەوتە حکومەت دەبێتە حکومەتێکی کاربەڕێکەر.

 

ئەوەی پێویستە بیزانیت: ئەم هۆشدارییە لە کاتێکدایە کە عێراق خۆی بۆ ئەنجامدانی هەڵبژاردنی گشتی لە کۆتایی ئەمساڵدا ئامادە دەکات و هەر گۆڕانکارییەک لە پێکهاتەی دادگای فیدراڵی دەتوانێت کاریگەریی ڕاستەوخۆی لەسەر پرۆسەی سیاسی و یاسایی وڵات هەبێت.

 

ئەمەش بزانە: دادگای فیدراڵی سەرۆک و هەشت ئەندامی سەرەکی هەیە، لەگەڵ چوار ئەندامی یەدەگ. لە ئەندامە سەرەکییەکان شیعە سەرۆکی دادگا و چوار ئەندام، سوننە دوو ئەندام و کورد دوو ئەندامی هەیە.