هیندستان دەیەوێت پەرەی زیاتر بە پەیوەندییەكانی لەگەڵ هەرێمی كوردستان بدات

ئاڤا نیوز

كونسوڵی گشتیی هیندستان لە هەرێمی كوردستان لە دیدارێكیدا لەگەڵ سەرۆكوەزیران مەسرور بارزانی خواستی وڵاتەكەی بۆ پەرەپێدانی زیاتر بە پەیوەندییەكانی لەگەڵ هەرێمی كوردستان دووپات دەكاتەوە.

چیرۆكی سەرەكی: ڕۆژی یەكشەممە، سەرۆكوەزیران مەسرور بارزانی پێشوازیی لە بریجیش کۆمار، کونسوڵی گشتیی هیندستان لە هەرێمی کوردستان کرد.

بڵاوكراوەی فەرمی: نووسینگەی سەرۆكوەزیران بە ناوی سەرۆکوەزیران مەسرور بارزانی بڵاوی كردەوە: لە دیدارێكدا پیرۆزبایی دەستبەكاربوونمان لە كونسوڵی گشتیی هیندستان كرد و  پشتیوانیی حکومەتی هەرێمی کوردستانمان بۆ سەرخستنی ئەرکەکەی دەربڕی.

زانیاریی زیاتر: لە دیدارەكەدا، کونسوڵی گشتیی هیندستان، خواستی وڵاتەکەی بۆ پەرەپێدانی زیاتری پەیوەندیی دوولایەنە لە بوارە جۆراجۆرەکاندا دووپات کردەوە، بە تایبەتی لە بوارەکانی وەبەرهێنان و  بازرگانی و تەندروستیدا.

لەلایەكی دیكەوە: لەبەشێکی دیکەی دیدارەکەدا، دۆخی ڕەوەندی هیندستانی لە هەرێمی کوردستان تاووتوێ كرا و لەمبارەیەوە کونسوڵی گشتیی هیندستان سوپاس و پێزانینی وڵاتەکەی بۆ ئاسانکاریی و هاریکاری لایەنە پەیوەندیدارەکانی حکومەتی هەرێمی کوردستانی نیشان دا.