ترەمپ: لە مانگە دەستکردەکان دەردەکەوێت بنکە ئەتۆمییەکانی ئێران سڕاونەتەوە

ئاڤا نیوز

 

سەرۆکی ئەمریکا لەبارەی هێرشەکەی سوپای وڵاتەکەی بۆ سەر بنکە ئەتۆمییەکانی ئێران دەڵێت،  "زیانێکی زۆر بەر بنکە ئەتۆمییەکانی ئێران کەوتووە، ئەمەش لە مانگە دەستکردەکان دەرکەوتووە، گەورەترین زیانیش بەر ناوەوەی بنکەکان کەوتووە، [سڕینەوە] دەستەواژەیەکی ڕاستە بەکاریبهێنم".

 

وێنە گەورەکە:  بەرەبەیانیی ڕۆژی یەکشەممە، ئەمریکا لەڕێگەی فڕۆکەی بی 2 هێرشی کردە سەر هەر سێ پێگەی سەرەکی ئەتۆمی ئەسفەهان، فۆردۆ و نەتەنز لە ئێران و خاپووری کردن؛ لە هێرشێکدا کە بە گوتەی بەرپرسانی ئەمریکا بۆمبی حەشارگە شکێن و نزیکەی 30 تۆماهۆک بەکارهێنراوە.

 

لێدوانی فەرمی: دۆناڵد ترەمپ، سەرۆکی ئەمریکا لە تۆڕی کۆمەڵایەتیی ترووس سۆشیاڵ نووسیوویەتیی، "زیانێکی زۆر بەر بنکە ئەتۆمییەکانی ئێران کەوتووە، ئەمەش لە مانگە دەستکردەکان دەرکەوتووە، گەورەترین زیان بەر ناوەوەی بنکەکان کەوتووە، [سڕینەوە] دەستەواژەیەکی ڕاستە بەکاریبهێنم، پێکهاتە سپییەکە لەناو بەرد بوو، بنمیچەکەشی زۆر لەوەوە بوو، پارێزراو بوو لە ئاگر، بەڵام گەورەترین زیان بەر بەشی ناوەوەی کەوت.

 

لەلایەکی دیکە: دۆرەسی شەی، باڵیۆزی ئەمریکا لە ئەنجومەنی ئاسایشی نێودەوڵەتیی لە کۆبوونەوەی نائاسایی ئەمشەوی ئەنجومەنی ئاسایش لە سەر پرسی هێرشی ئەمریکا بۆ سەر ئێران ڕایگەیاند: ئەمریکا لە چوارچێوەی پارێزگاریکردن لە ئیسرائیل هێرشی کردووەتە سەر پێگە ئەتۆمییەکانی ئێران و بەردەوام دەبین لەو پارێزگارییە، گەر ئێران پلانی وەڵامدانەوەی هەبێت و هێرش بکاتە سەر هەر بنکە و بەرژەوەندیەکی ئەمریکا لە رۆژهەڵاتی ناوەڕاست ئەوا وەڵامی ویرانکەرمان بۆ ئێران دەبێت و بە هێزێکی زیاترەوە هێرشیان دەکەینە سەر.

 

ئەوەی پێویستە بیزانیت: پێشتر ئێران هۆشداری ئەوەی دابووە واشنتن کە ئەگەر هێرش بکاتە سەر بنکە ئەتۆمییەکانی، ئەوا بەرژەوەندییەکانی ئەمریکا لە ڕۆژهەڵاتی ناوەڕاست دەکەنە ئامانج.