حیزبەكانی ڕۆژئاوای كوردستان داوای بەسزا گەیاندنی پیلانداڕێژەری تەقینەوەی كەنیسەكەی دیمەشق دەكەن

ئاڤا نیوز

سەرجەم هێز و لایەنە سیاسییەكانی ڕۆژئاوای كوردستان، بە پاكێجێكی هاوبەش داوای بەسزاگەیاندنی ئەو كەس و لایەنانە دەكەن كە پیلانداڕێژەری تەقینەوە خۆكوژییەكەی كەنیسەی دیمەشق بوون.

چیرۆكی سەرەكی: ئێوارەی ڕۆژی یەكشەممە 22ـی حوزەیرانی 2025، لە پێشهاتێكی نەخوازراودا، تەقینەوەیەكی خۆكوژی لەنێو كەنیسەی 'مار ئیلیاس' لە شاری دیمەشق ڕوویدا، كە بە گوێرەی نوێترین ئاماری دەسەڵاتدارانی سووریا، ژمارەی قوربانیان گەیشتووەتە 22 كوژراو و 63 بریندار.

ڕاگەیێنراوی فەرمی: هێز و لایەنە سیاسییەكانی ڕۆژئاوای كوردستان، لە ڕاگەیێنراوێكی هاوبەشدا، وێڕای ئیدانەكردنی ئەو هێرشە تیرۆرستییە، بە هەڕەشەیەكی ترسنۆكانە بۆ سەر پیرۆزییە ئایینیەكان و مافی مرۆڤ و پێكەوەژیانی ئاشتیانە دایدەنێن، داواش دەكەن لێكۆڵینەوەی ورد لەو كردە تاوانكارییە بكرێت و تاوانباران سزا بدرێن.

لەلایەكی دیكەوە: هێزەكانی سووریای دیموكرات هەسەدە، شەوی ڕابردوو هێرشە تیرۆرستییەكەی شەرمەزار كرد و دووپاتیشی كردەوە، هەماهەنگیی پێویست لەگەڵ دەسەڵاتدارانی دیمەشق دەكەن لەپێناو هێنانەدی سەقامگیری و ئاشتی.

هەروەها ئیدارەی خۆسەر لە باكوور و ڕۆژهەڵاتی سووریا ئیدانەی پەلامارەكەی كرد و داوای بە سزاگەیاندنی تاوانبارانی كرد.