مامۆستایانی زانکۆ حکومییەکانی کوردستان دەتوانن لە زانکۆ ئەهلییەکان وانە بڵێنەوە

ئاڤا نیوز

ئەنجوومەنی شورای هەرێمی کوردستان، بڕیاری دادگەی دەستەی بەرزەفتەکردن پەسەند کرد، سەبارەت بە گشتاندنێکی وەزارەتی خوێندنی باڵا و زانستیی توێژینەوەی کە ڕێگری لە مامۆستایانی زانکۆ و پەیمانگە حکومییەکان دەکات، لە زانکۆ و پەیمانگە ئەهلییەکان وانە بڵێنەوە، هەزاران مامۆستا لەو بڕیارە سوودمەند دەبن.

 

چیرۆکی سەرەکی: لە 05-09-2024 وەزارەتی خوێندنی باڵا گشتاندنێکی دەرکرد بۆ سەرجەم زانکۆ حکومییەکانی هەرێمی کوردستان کە نابێت مامۆستایانی زانکۆ وەک وانەبێژ لە زانکۆ و پەیمانگە وانە بڵێنەوە، ئەمەش کاردانەوەی مامۆستایانی لێکەوتەوە و دادگەی کارگێڕی و دەستەی بەرزەفتەکردن تانەیان لێدا.

 

لێدوانی فەرمی: د. هەرێم محەممەد پرۆفیسۆری یاریدەدەر لە زانکۆی پۆلیتەکنیکی هەولێر، بە ئاڤای گوت، "دادگەی دەستەی بەرزەفتەکردنی فەرمانبەران لە ئەنجوومەنی شورای هەرێمی کوردستان ڕۆژی 28-04-2025 بڕیار درا بە هەڵوەشاندنەوەی ئەو گشتاندنە، چونکە پێچەوانەیە لەگەڵ ماددەی 19 لقی سێیەم لە یاسای زانکۆ و پەیمانگە تایبەتەکانی هەرێمی کوردستان کە دەڵێت ئەندامانی دەستەی وانە گوتنەوە دوای تەواوکردنی ڕادەی یاسایی لە زانکۆ بەڕەزامەندی سەرۆک بەش و ڕاگرایەتی بۆیان هەیە بە سیفەتی دەرەکی وانە بڵێنەوە ."

 

گوتیشی، "ئەو گشتاندنە پێچەوانەی ماددەی دووشە لە ڕێنمایی وەزارەتی خوێندنی باڵا و توێژینەوەی زانستی کە ساڵی 2013 دەرچووە و ڕێگە دەدات بە مامۆستایان لە زانکۆ و پەیمانگە ئەهلییەکان وانە بڵێنەوە."

 

ئەوەی پێویستە بیزانیت: بەهۆی بڕیاڕی قەدەغەکردنی وانەگوتنەوەی مامۆستایان، بووە هۆی ئەوەی بەشێکی زانکۆ ئەهلییەکان ناچاربن مامۆسیای وانەبێژ لە دەرەوەی وڵات بهێنن بۆ ئەوەی بۆشاییەکان پڕ بکەنەوە.

 

بۆچوونی لایەنی بەرامبەر: د.توانا نەجەف، بەڕێوەبەری گشتیی فەرمانگەی کارگێڕی و دارایی لە وەزارەتی خوێندنی باڵا بە ئاڤا میدیای گوت، "ئەمە بڕیاری وەزارەتی خوێندنی باڵا نەبووە، بەڵکو گشتاندنی ڕاپۆرتی دیوانی چاوێری بووە، چونکە بەپێی ڕاپۆرتەکە لەبەر ئەوەی مامۆستایان لە زانکۆکان پاداشتی دارایی وەردەگرن، ناتوانن لە زانکۆ ئەهلییەکان وانە بڵێنەوە، بەڵام دوای ئەو بڕیارەی ئەنجوومەنی شورا دەتوانن وانە بڵێنەوە."