بەرپرسێکی باڵای ئێران: هیچ پێشنیازێکی ئاگربەستمان بەدەست نەگەیشتووە

ئاڤا نیوز

 

بەرپرسێکی باڵای ئێران ڕایدەگەیێنێت، وڵاتەکەی هیچ پێشنیازێکی ئاگربەستی بۆ کۆتاییهێنان بە جەنگی 12ڕۆژەی نێوان ئیسرائیل و ئێران پێنەگەیشتووە.

وێنە گەورەکە: دوای بەردەوامبوونی جەنگ بۆ ماوەی 12 ڕۆژ، دۆناڵد ترەمپ سەرۆکی ئەمریکا، لە تۆڕی کۆمەڵایەتیی ترووس سۆشیاڵ کۆتاییهاتنی جەنگی ئیسرائیل و ئێرانی ڕاگەیاند و گوتی، "هەردوو وڵات لەسەر ئاگربەست ڕێککەوتن".

لێدوانی فەرمی: بەرپرسێکی باڵای ئێران بە کەناڵی سی ئێن ئێنی ڕاگەیاند، "ئێران بەردەوام دەبێت لە شەڕکردن تا گەیشتن بە ئاشتییەکی بەردەوام و لێدوانەکانی ئیسرائیل و ئەمریکا بە "فێڵ" دەزانێت بۆ پاساوهێنانەوە بۆ هێرشکردنە سەر بەرژەوەندییەکانی ئێران.

ئەو بەرپرسە گوتوشیەتی، لەم ساتەدا دوژمن هێرش دەکاتە سەر ئێران و ئێرانیش لە لێواری زیادکردنی هێرشە تۆڵەسەندنەوەکانیەتی و گوێ بە درۆی دوژمنەکانی نادات.

ئەوەی پێویستە بیزانیت: دۆناڵد ترەمپ، سەرۆکی ئەمریکا لە ترووس سۆشیاڵی خۆی نووسیوویەتی، "پیرۆزە لە هەمووان، ڕیککەوتنی تەواوەتی لە نێوان ئیسرائیل و ئێران کراوە بۆ ئەنجامدانی ئاگربەستی گشتگیر و تەواوەتی، لە ماوەی شەش کاتژمیری داهاتوودا دەستپێدەکات.

 

- بۆ ماوەی 12 کاتژمێر ئێران ئاگربەست ڕادەگەیێنێت بەهەمان شێوەی ئیسرائیلیش 12 کاتژمێر ئاگربەست ڕادەگەیێنێت، لەدوای ئەو 24 کاتژمێرە بەشێوەیەکی فەرمی کۆتایی جەنگی 12 ڕۆژە ڕادەگەیێنرێت وە هەموو جیهان ئاهەنگی ڕاگرتنی جەنگ دەگێرن.

- هەموو لایەنەکانی دیکە بە ئاشتی خوازانە و ڕێزگرتنەوە بارودۆخەکە بەڕێوەدەبەن.

- هەموولا ئەو کارانە ئەنجام دەدەن کە پێویست دەکات بیکەن بەپێویستی دەزانم پیرۆزبایی لە هەردوو وڵاتەکە بکەم، ئێران و ئیسرائیل، کە ژیری و ئازایەتی و بوێرییان هەبوو بۆ کۆتایی هێنان بەم جەنگە، پێویست دەکات ئەم جەنگە بە جەنگی 12 ڕۆژە ناو بەرین، جەنگێک کە دەکرا بۆ ماوەی چەندین ساڵ درێژە بکێشێت، جەنگێک کە دەکرا ڕۆژهەڵاتی ناوەڕاست وێران بکات، بەڵام ئەوە ڕووی نەدا و هەرگیز ڕوونادات.


- خودا ئیسرائیل بپارێزێت، خودا ئێران بپارێزێت، خودا ڕۆژهەڵاتی ناوەڕاست بپارێزێت، خودا جیهان بپارێزێت.