لە 67 ناوچەی دارستانی تورکیا ئاگر دەکەوێتەوە

ئاڤا نیوز

ماوەی چەند ڕۆژێکە، ئاگرێگی فراوان، دارستانەکانی شارە جیاوازەکانی وەک ئیزمیر، غازی عەنتاپ، سەکاریا و چەند ناوچەیەکی دیکەی تورکیای گرتووەتەوە، دارستانەکانی ئەو ناوچانە لە چوار لاوە دەسوتێن، تیمە فرایگوزارییەکانیش لە ئاسمان و زەوی هەوڵ دەدەن، ئاگرەکە کۆنترۆل بکەن.

ئەوەی ئێستا ڕوودەدات: بەهۆی بەرزبوونەوەی پلەی گەرما ناوچە دارستانییەکانی تورکیا بەتایبەت شاری ئیزمیر، ئاگرێکی گەورەی لێکەوتووەتەوە، ئاگرەکەی ئیزمیر تەشەنەی کردو گەیشتووەتە ناو ماڵەکانی شارەکە، خەڵک ماڵیان چۆڵ کردووە لە ترسی ئاگرەکە.

لێدوانی فەرمی: ئیبراهیم یوماکڵی، وەزیری دارستان و ژینگەی تورکیا ڕایگەیاندووە، تەنیا ئەمڕۆ لە 67 ناوچە ئاگر دروست بووە، توانیومانە 63ـیان کۆنترۆڵ بکەین، بەڵام هێشتا ئاگرەکەی سەکاریا بەردەوامە و کۆنترۆڵ نەکراوە.

زانیاریی زیاتر: بە گوتەی یوماکڵی، هۆکاری ئاگری دارستانەکانی تورکیا، گۆڕانی کەشوهەوای ناوچەکە و بەرزبوونەوەی پلەی گەرمایە، بەوەی لە هەر دەرفەتێکدا تورکیا تووشی وشکە ساڵی سەخت دەبێت، بەرزبوونەوەی پلەی گەرما، زۆرتر کاریگەری لەسەر تورکیا دروست دەکات.

باکگراوند: لەسەرەتای ئەمساڵەوە، هەزار و 89 ئاگر لە ناوچە دارستانییەکانی تورکیا کەوتووەتەوە، بەهۆیەوە هەزار و 823 هێکتار زەوی دارستانی سووتاون. تەنیا دارەکان نەسووتاون، بەڵکو سەرجەم ئەو زیندەوەر و ئاژەڵانەی لەو ناوچانە دەژین، بەهۆیەوە سووتاون.