زیاتر لە سێ ملیۆن کەس لە هەرێمی کوردستان خۆیان لە فۆڕمی خۆراک تۆمارکردووە

ئاڤا نیوز

نزیکەی مانگێکە ئەپڵیکەیشنی پڕکردنەوەی پسوولەی ئەلیکترۆنی خۆراک کارا کراوە، 64%ـی ئەو کەسانەی سوودمەند دەبن ناوی خۆیان تۆمارکردووە و ئەگەر لەماوەی دیاریکراو تەواو نەبن، وادەکە درێژ دەکرێتەوە.

چیرۆکی سەرەکی: کەمتر لە هەفتەیەک ماوە بۆ پڕکردنەوەی پسوولەی خۆراکی هاووڵاتیان و لە سەرجەم ناوچەکانی هەرێمی کوردستان پرۆسەکە بەردەوامە و ڕۆژانە سەدان کەس ناوی خۆیان تۆماردەکەن.

لێدوانی فەرمی: نەوزاد شێخ کامیل، بەڕێوەبەری گشتیی بارزگانی لە وەزارەتی بازرگانی و پیشەسازیی هەرێمی کوردستان بە ئاڤای گوت، "64%ـی هاووڵاتیان خۆیان تۆماکردووە، ئەگەر تاوەکو 2025-07-05، سەرجەمیان تۆمار نەکرێن، داواکاریی درێژکردنەوەی وادەکە ڕەوانەی وەزارەتی بازرگانی عێراق دەکەین."

ئەمەش بزانە: لە هەرێمی کوردستان پێنج ملیۆن و 350 هەزار کەس لە فۆڕمی خۆراک سوودمەند دەبن، تاوەکو ئێستا سێ ملیۆن و 424 هەزار کەس خۆیان تۆمارکردووە.