ئەمریکا بۆ سوودانی: پێش سەردانەکەت کێشەکان لەگەڵ هەولێر چارەسەر بکە

ئاڤا نیوز

لە کاتی ئامادەکاری بۆ سەردانەکەی سەرۆکوەزیرانی عێراق بۆ ئەمریکا، بەرپرسانی واشنتن پێیان ڕاگەیاندووە، پێش سەردانەکەت بۆ ئەمریکا بە لێکتێگەیشتن کێشەکان لەگەڵ حکومەتی هەرێمی کوردستان چارەسەر بکە. 

زانیاریی تایبەت: یەکێک لە ئەجێنداکانی کۆبوونەوەی نێوان محەممەد شیاع سوودانی، سەرۆکوەزیرانی عێراق و جۆ بایدنی سەرۆکی ئەمریکا کێشەکانی نێوان هەولێر و بەغدایە، لە کاتی ئامادەکاری بۆ سەردانەکە،  ئیدارەی بایدن بە سوودانییان گوتووە، پێش ئەوەی سەردانی واشنتن بکەیت، بە لێکتێگەیشتن کێشەکان لەگەڵ حکومەتی هەرێمی کوردستان چارەسەر بکە، بەتایبەتی پرسی دەستپێکردنەوەی هەناردەکردنی نەوتی هەرێمی کوردستان، مووچە و بودجە.

چیرۆکی سەرەکی: محەممەد شیاع سوودانى، سەرۆکوەزیرانی عێراق، ڕۆژی 15-04-2024 لەسەر بانگهێشتی جۆ بایدن، سەرۆکی ئەمریکا سەردانی واشنتن دەکات و دیداری لووتکە دەکەن، بەرقەرارکردنی سەقامگیری لە ناوچەکە گەرمترین پرسی گفتوگۆکانیان دەبێت.

ئەوەی پێویستە بیزانیت: سەردانی سوودانی بۆ واشنتن، دوای سەردانی سەرۆکوەزیرانی بارزانی دێت بۆ ئەمریکا و کۆبوونەوەی لەگەڵ بەرپرسانی باڵای ئەو وڵاتە، ئیدارەی بایدن و هەردوو پارتی کۆماری و دیموکرات لە کۆنگرێسی ئەمریکا پشتیوانی خۆیان بۆ هەرێمی کوردستانی خۆڕاگر دووپات کردەوە.