یارییەکەی دهۆک و زاخۆ گواسترایەوە بەغدا

ئاڤا نیوز

بەهۆکاری ئەمنی و تەکنیکی بڕیار درا یاری کۆتایی جامی عێراق کە لە نێوان هەردوو یانەی دهۆک و زاخۆ دەکرێت، بگوازرێتەوە شاری بەغدا و لە یاریگای شەعب بەڕێوەبچێت.

 

نووسراوی فەرمی: یەکێتیی تۆپی پێی عێراق بڵاویکردەوە، پاڵپشت بە نووسراوی وەزارەتی ڕۆشنبری و لاوان- بەڕێوەبەرایەتیی گشتیی وەرزش/ بەشی یانەکانی هەرێمی کوردستان بە ژمارە 796 لە ڕێککەوتی 2025-7-15، کە تێیدا ئاماژە بەوە کراوە، یاریگای نەورۆز لە سلێمانی لە ڕووی تەکنیکی و ئەمنییەوە ئامادە نییە یاری کۆتایی جامی عێراقی تێدا بەڕێوەبچێت.

 

بەگوێرەی ڕاگەیێنراوەکەی یەکێتیی تۆپی پێی عێراق، لەپێناو پاراستنی سەلامەتی جەماوەر و گەرەنتیکردنی بەڕێوەچوونی یاریی کۆتایی بە باشترین شێوە، لیژنەی پێشبڕکێکان لە یەکێتی تۆپی پێی عێراق بڕیاری دا بە گواستنەوەی یاریی کۆتایی پاڵەوانی جامی عێراق بۆ یاریگای نێودەوڵەتیی شەعب.

 

ئەوەی پێویستە بزانیت: یارییەکە لە کاتژمێر 8ـی ئێوارەی ڕۆژی هەینی 18ـی تەمموزی ئەم مانگە بەرێوەدەچێت.