کاروانێکی هاوکاری دەگەیێنرێتە دهۆک

ئاڤا نیوز

کاروانێکی هاوکاری کە لە 18 بارهەڵگر پێکهاتووە، لەسەر ڕاسپاردەی سەرۆک بارزانی و سەرۆکوەزیران بارزانی گەیێنرایە زیانلێکەوتووانی دهۆک.

وێنە گەورەکە: قەرەبووکردنەوەی زیانلێکەوتووانی لافاوەکەی سنووری پارێزگای دهۆک بەردەوامە و بڕیارە تاوەکو جەژن هاوکاریی پێویست پێشکەش بە سەرجەمیان بکرێت.

لێدوانی فەرمی: عەلی تەتەر، پارێزگاری دهۆک بە ئاڤا نیوزی ڕایگەیاند، 18 بارهەڵگری هاوکاری گەیشتوونەتە دهۆک، کە پێداویستی نێوماڵیان بۆ زیانلێکەوتووانی لافاو هەڵگرتووە. 

زانیاریی زیاتر: سەرۆک بارزانی و سەرۆکوەزیران بارزانی بەردەوام بۆ بەدواداچوون و ئاگاداربوون لە دۆخی زیانلێکەوتووان لەسەرهێڵن. پارێزگاری دهۆکیش دڵنیایی دا لەوەی سەرجەم زیانلێکەتووان قەرەبوو دەکرێنەوە و هیچ کەسێک بێبەش ناکرێت.

باکگراوند: 19ی ئەم مانگە لافاوێکی بەهێز سنووری پارێزگای دهۆکی گرتەوە، بەهۆیەوە سێ هاونیشتمانی گیانیان لە دەست دا، زیاتر لە هەزار خانوو و 200 ئۆتۆمبێل زیانیان بەرکەوت.

ئەوەی پێویستە بیزانیت: لە ماوەی کەمتر لە 48 کاتژمێردا 117 شووقە پێشکەشی ئەو خێزانانە کران کە ماڵەکانیان لە گەڕەکی هیشکەڕو بەتەواوی ڕووخان،  هاوکاریی ماددیشیان پێشکەش کرا بۆ کڕینی کەلوپەلەکانی ماڵ.