لیژنەی هونەریی هەولێر و بەغدا لەبارەی ڕێککەوتنەکەی نێوانیان کۆ دەبنەوە

ئاڤا نیوز

 

بڕیارە ڕۆژی سێشەممە کۆبوونەوەی لیژنەی هونەریی حکومەتی عێراق و حکومەتی هەرێمی کوردستان لەبارەی ڕێکارەکانی جێبەجێکردنی ڕێککەوتنەکەی نێوانیان بکرێت. ئەندامێکی کوردی لیژنەی دارایی پەرلەمانی عێراقیش دەڵێت، تاوەکو پابەندی تەواو بە ڕێککەوتنەکە نەکرێت، مووچەی فەرمانبەران ڕەوانە ناکرێت.

 

لێدوانی فەرمی: محەممەد نووری، ئەندامی لیژنەی دارایی بە ئاڤای ڕاگەیاند، ڕۆژی سێشەممە کۆبوونەوەی لیژنەی هونەری لەنێوان حکومەتی فیدراڵ و حکومەتی هەرێمی کوردستان دەکرێت.

 

محەممەد نووری دەشڵێت، ئەمڕۆ تەیف سامی لە میانی میوانداریکردنی لەلایەن لیژنەی دارایی پەرلەمانەوە جەختی کردووەتەوە کە "تاوەکو پابەندی تەواو بە ڕێککەوتنەکە نەکرێت، مووچەی فەرمانبەران ڕەوانە ناکرێت".

 

مەرجەکانی ڕێککەوتنەکە چین؟ پێشتر هەولێر و بەغدا لەسەر ئەوە ڕێککەوتن کە هەرێمی کوردستان پابەند دەبێت بە ڕادەستکردنی 120 ملیار دینار داهاتی ناوخۆ و هەناردەکردنەوەی نەوتی کوردستان لەڕێگەی سۆمۆوە، لەبەرامبەردا بەغدا مووچەی فەرمانبەرانی کوردستان ڕەوانە دەکات.

 

هاوکات؛ نەرمین مەعروف، ئەندامی لیژنەی دارایی پەرلەمانی عێراق ڕایگەیاند، وەک وەزارەتی دارایی خۆشحاڵن بەو ڕێککەوتنەی لەنێوان حکومەتی عێراق  و هەرێمی کوردستان کراوە، بەپێی ئەو ڕێککەوتنەشی هەیە پێویستە هەرێمی کورستان لەرێگەی کۆمپانیای سۆمەوە دەست بە هەناردەکردنەوەی نەوت بکرێت.

 

لەلایەکی دیکە: ئەمڕۆ یەکشەممە لیژنەی دارایی پەرلەمانی عێراق میوانداریی تەیف سامی، وەزیری دارایی عێراقی کرد و بەر لە دەستپێکی کۆبوونەوەکە و لە وەڵامی پرسیارێکی ڕۆژنامەنووساندا کە ئایا کەی مووچەی فەرمانبەرانی کوردستان دەنێرێت، تەیف سامی گوتی: "نازانم".

 

نەرمین مەعروف دەشڵێت، دەبێت حکومەتی عێراق دڵنیا بێتەوە کە نەوتی هەرێمی کوردستان هەناردە کراوە و داهات ڕادەست کراوە، دواتر بەغدا مووچەی مانگی پێنج ڕەوانە دەکات.

 

ئەوەی پێویستە بیزانیت: پێشتر بەرپرسێکی باڵای کورد لە بەغدا بە ئاڤای ڕاگەیاندبوو، کێشە بۆ ڕێککەوتنەکە دروست نابێت، کاتێک گرفتێکی بچووک دێتە پێشەوە، بەغدا چاوەڕوان دەکات تاوەکو گرفتەکە چاک دەبێتەوە، ئەگەر گرفتەکە چارەسەر بوو و ئەوکات نەوت ڕادەست نەکرا، ئینجا کێشە بۆ ڕێککەوتنەکە دروست دەبێت.