ئاڤا کارێکی نایاسایی لە نەخۆشخانە حکومییەکان ئاشکرا دەکات

ئاڤا نیوز

لە بەدواداچوونێکی وردی ئاڤا، دەرکەوتووە لە نەخۆشخانەی فێرکاریی هەولێر (جمهوری)، هەندێک پزیشک و کارمەند و خەڵکی مەدەنی نەخۆش هان دەدەن بچن لە نەخۆشخانە تایبەتەکان چارەسەر وەربگرن و کاری دەڵاڵی و ڕیکلام بۆ نەخۆشخانە تایبەتەکان دەکەن، بەڕێوەبەری نەخۆشخانەکەش دەڵێت، "هەر نەخۆشێک ئەو داوایەی لێ کرا با بێت سکاڵا تۆمار بکات".

چیرۆکی سەرەکی: بەپێی بەدواداچوونی ئاڤا، هەندێک پزیشک و کارمەند و خەڵکی مەدەنی هەن وەک دەڵاڵ لە بەشێک لە نەخۆشخانە حکومییەکانی هەولێر و کوردستان کار بۆ سەنتەر و نەخۆشخانە تایبەتەکان دەکەن، بە جۆرێک نەخۆش هان دەدەن بچن لە نەخۆشخانە تایبەتەکان چارەسەر  وەربگرن.

چی ڕوودەدات: ئامێرەکانی تیشک، تیشکی ڕەنین، ئێم ئاڕ ئای و سیتی سکان لە نەخۆشخانەکانی هەرێمی کوردستان و هەولێر ژمارەیان کەمە، لە سنووری هەولێر تەنیا 50 دانە هەیە، ئەمەش بەهۆی ئەوەی نرخی ئامێرەکان زۆر گرانە، گرتنی ئەم تیشکانە بەخۆڕایی لە نەخۆشخانە حکومییەکان سەرەی زۆری دەوێت، هەندێک کات حەوت بۆ هەشت مانگ.

ئەگەر نەخۆش بیەوێت ئێواران تیشکەکە بگرێت، کە پێی دەگوترێت نیمچە تایبەت بە 65 هەزارە، هەندێک کەس هەن کە خۆیان لەگەڵ سەنتەر و نەخۆشخانە تایبەتەکان هاوبەشن، ئەو هەلەیان قۆستووەتەوە و نەخۆشەکان هان دەدەن بچنە نەخۆشخانە تایبەتەکان، پێیان دەڵێن لێرە سەرە زۆرە، ئێواران گرانە، سەنتەر و نەخۆشخانەی تایبەت هەیە زۆر هەرزانە،  بە 35 بۆ 40 هەزارە.

بەدواداچوونی ئاڤا: پەیامنێری ئاڤا ئەم بەدواداچوونەی کردووە، بە مەیدانی چووەتە نەخۆشخانەی هەولێری فێرکاری، ماسکی بەستووە بۆ ئەوەی نەناسرێتەوە، لەگەڵ نەخۆشەکان قسە دەکات بۆ ئەوەی بزانێت چی دەگوزەرێت.

دەچێتە لای گەنجێک کە ئەم بابەتەی بەسەردا هاتووە، چیرۆکەکەی خۆی دەگێڕێتەوە دەڵێت، هەر لەم نەخۆشخانەیە چوومە لای دکتۆر، تیشکی ڕەنینم پێویست بوو، بەڵام دکتۆرەکە بێهیوای کردم، ئیتر بۆی خوێندم، منیش کە زانیم بەزمەکەیە ڕاستەوخۆ جێمهێشت.

پەیامنێری ئاڤا لەکاتی بەدواداچوونەکەیدا بزنس کاردی شوێنێکی تایبەتی دەست کەوتووە کە تیشکی رەنین بە 39 هەزار دینار دەگرن، ئەو بزنس کاردە لەڕێگەی ئەو دەڵاڵانەوە لەنێو نەخۆشخانە حکومییەکان بڵاودەکرێتەوە.

لێدوانی فەرمی: عەبدوڵڵا گەیلان، بەڕێوەبەری نەخۆشخانەی فێرکاریی هەولێر بە ئاڤای وت: هەر نەخۆشێک تووشی کەسێکی وا بوو، یەکسەر با سەردانی من بکات سکاڵا تۆمار بکات و دەرگای ژوورەکەم بۆ نەخۆشەکان واڵایە. 

لەلایەکی دیکەوە: دلۆڤان محەممەد فاتح، بەڕێوەبەری گشتی تەندروستی هەولێر بە ئاڤای گوت: ئەم بابەتەی ئێوە وەک ئاڤا بەدواداچوونتان بۆی کردووە بە هەموو شێوەیەک نایاساییە و نابێت شتی ئاوا لەنەخۆشخانەکان ڕووبدات، هەر بۆیە بەزووترین کات لە ڕێگەی لیژنەکانمانەوە بەدواداچوونی ورد دەکەین.