لە میسان خۆپیشاندان دژی نەبوونی کارەبا دەستیپێکرد

ئاڤا نیوز

سەدان کەس لە دانیشتوانی قەزای کەحلا لە پارێزگای میسان، خۆپیشاندانێکی ناڕەزایەتییان دژی خراپی ڕەوشی خزمەتگوزاری و پچڕانی بەردەوامی کارەبا ئەنجام دا.

زانیاری بەدەستهاتوو: سەرچاوەیەک لە حکومەتی خۆجێی میسان ڕایگەیاند، درەنگانی شەوی ڕابردوو خۆپیشاندەران لە بەرامبەر خراپی خزمەتگوزارییە سەرەتاییەکان و بەردەوامیی بڕینی کارەبای نیشتمانی ڕێگای سەرەکی نێوان عیمارە و قەزای کەحلایان داخست.

زانیاریی زیاتر: خۆپیشاندەران داوای دەستوەردانی بەپەلەی حکومەتی خۆجێی میسان و وەزارەتی کارەبایان کرد بۆ چارەسەرکردنی پچڕانی بەردەوامی کارەبا، بەتایبەت لەم کاتەدا کە پلەکانی گەرما بەشێوەیەکی بەرچاو بەرزبوونەتەوە.

ئەوەی پێویستە بیزانیت: بەپێی زانیارییەکان کارەبا نیشتمانی لەزۆربەی پارێزگاکانی عێراق بەتایبەت باشوور لە شەشە تا 12 کاتژمێر تێناپەڕێت هەروەها بەردەوام دەبڕێت، ئەمەش لەکاتێکدایە پلەکانی گەرما لەو پارێزگایانە نیوەی کوڵانی تێپەڕاندووە.