دوای دەرچوونی مەرسوومی کۆماری، عەتوان عەتوانی وەک پارێزگاری نوێی بەغدا دەستبەکاربوو

ئاڤا نیوز

دوای دەرچوونی مەرسوومی کۆماری بۆ دامەزراندنی، عەتوان عەتوانی ئەمڕۆ بە فەرمی سوێندی یاسایی خوارد و وەک پارێزگاری نوێی بەغدا دەستبەکاربوو.

 

ئەوەی پێویستە بیزانیت: لە کۆبوونەوەی ڕۆژی 27ـی تەمموزی 2025، ئەنجوومەنی پارێزگای بەغدا، عەتوان عەتوانی دەنگی زۆرینەی ئەندامانی ئەنجوومەنەکەی بەدەستهێنا و وەک پارێزگاری نوێی بەغدا هەڵبژێردرا.

 

لێدوانی فەرمی: لە یەکەم لێدوانیدا دوای دەستبەکاربوونی، عەتوانی مەرسوومە کۆمارییەکەی بە "مەدالیای شەرەف" بۆ خزمەتکردنی خەڵکی بەغدا ناوبرد و جەختی لەسەر گرنگیی بەرزکردنەوەی ئاستی خزمەتگوزارییەکان کردەوە.

 

گوتیشی، "سیاسەتی تەواوکاریمان لەنێوان هەردوو دەسەڵاتی یاسادانان و چاودێری و حکومەتی جێبەجێکاری خۆجێی پەیڕەو کردووە، بە ئامانجی بەهێزکردنی ئاستی خزمەتگوزاری و کارگێڕی."

 

دڵنیایی دەدات: پارێزگاری بەغدا بەڵێنی دا کە "قۆناغی داهاتوو، قۆناغی پەیوەندیی ڕاستەوخۆ دەبێت لەگەڵ هاووڵاتییان و دابەزینی مەیدانی بۆ ئاگاداربوون لە پێداویستییەکانی شەقام و خێراکردنی جێبەجێکردنی پڕۆژەکان."