عێراق لەڕێگەی "ستراتیژیی پێنج ساڵە" کار بۆ کەمکردنەوەی ڕێژەی هەژاری دەکات

ئاڤا نیوز

 

ئەمڕۆ دەرئەنجامی ڕاپۆرتی تایبەت بە هەژاری لە عێراق و هەرێمی کوردستان بڵاو دەکرێتەوە، وەزارەتی پلاندانانی فیدڕاڵ ڕاپۆرتەکەی بە هاوکاری نەتەوەیەکگرتووەکان ئامادە کردووە و ستراتیژی پێنج ساڵەشی لەگەڵدا داڕێژراوە بۆ ئەوەی ڕێژەی هەژاری بۆ خوار 10% کەم بکرێتەوە.

 

ئەوەی پێویستە بیزانیت: بەگوێرەی وەزارەتی پلاندانانی عێراق ساڵی 2022 ڕێژەی هەژاری لە وڵاتدا 24% بووە، بەڵام ساڵی ڕابردوو ڕێژەکە بۆ  17.5% دابەزیووە، بەمەبەستی زیاتر دابەزاندنی ئەو ڕێژەیەش وەزارەتەکە ستراتیژییەکی پێنج ساڵەی ڕاگەیاندووە و دەیەوێت لەو ماوەیەدا ڕێژەکە بگەیێنێتە 10%.

 

ڕاگەیێنراوی فەرمی: وەزارەتی پلاندانانی عێراق ڕایگەیاند، ڕاپۆرتی نیشتمانی تایبەت بە هەژاریی ئەمڕۆ چوارشەممە ڕادەگەیێنرێت کە دەستەی ئاماری فیدڕاڵ بە هاوکاری دەستەی ئاماری هەرێمی کوردستان ئامادەی کردووە، هاوکات نەتەوەیەکگرتووەکان و تیمی ئۆکسفۆردیش بۆ گەشەپێدانی مرۆیی پشتیوانی ئامادەکردنی ڕاپۆرتەکە بوون.

 

ئەوەی پێشبینی دەکرێت: بڕیارە لە کۆنگرەی ڕاگەیاندنی دەرئەنجامەکانی هەژاریی، محەممەد تەمیم، وەزیری پلاندانان، بریکاری وەزارەتەکان، سەرۆکی زانکۆکان، باڵیۆزی وڵاتانی بیانی و نوێنەری ڕێکخراوە نێودەوڵەتییەکان ئامادە بن.