ئەو کەسەی لە هەولێر فێڵی لە خێزانێکی ڕۆژهەڵاتی کوردستان کرد دەستگیر کرا

ئاڤا نیوز

دوای ئەوەی هەفتەی ڕابردوو خێزانێکی خەڵکی ڕۆژهەڵاتی کوردستان کە بەمەبەستی چارەسەری پزیشکی سەردانی هەولێریان کردبوو، لەلایەن کەسێکەوە فێڵیان لێکرا و پارەکەیان لێ سەندرا، ئاڤا دەنگی گەیاندن، ئەمڕۆ هێزە ئەمنییەکانی هەولێر ڕایانگەیاند کە تۆمەتبارەکەیان دەستگیر کردووە و تەواوی پارەکەش بۆ خێزانەکە گەڕێندراوەتەوە.

چیرۆکی سەرەکی: خێزانێکی ڕۆژهەڵاتی کوردستان، کە بۆ چارەسەری پزیشکی سەردانی هەولێریان کرد، لەلایەن کەسێکەوە فێڵیان لێکراو لە دۆخێکی خراپدا مانەوە. دوای ئەوەی ئاڤا میدیا، کێشەکەیانی خستەڕوو، دەستبەجێ قایمقامی هەولێر هاتە سەر خەت و بەڵێنی بەدواداچوونی دا. هاوکات هۆتێلێکی بۆ خێزانەکە دابین کرد و پێی ڕاگەیاندن: "تا کێشەکەتان چارەسەر دەبێت، ئێمە لە خزمەتتاندادەبین."

لێدوانی فەرمی: قایمقامی هەولێر بە ئاڤای ڕایگەیاند، تۆمەتبارەکە دۆزراوەتەوە و دەستگیرکراوە. پەیوەندی بە خێزانەکەی ڕۆژهەڵاتەوە کراوە و هەموو پارەکەیان بۆ گەڕاندووەتەوە.

ئەو خێزانە وێڕای سوپاسکردنیان بۆ هێزە ئەمنییەکان و قایمقامی هەولێر، سوپاسێکی تایبەتیان ئاراستەی ئاڤا  کرد بۆ گەیاندنی دەنگیان و بەهاناوەچوونیان.