گرفتی كەمئاوی هەڵەبجە و سەیدسادق چارەسەر دەكرێت

ئاڤا نیوز

ماوەی چەند ڕۆژێكە، ترۆمپاكانی وێستگەی پرۆژەی ئاوی هەڵەبجە- سیروان- سەیدسادق لەكاركەوتووە، بەشێك لە دانیشتووانی هەڵەبجە و سەیدسادق، گرفتی كەمئاویان بۆ دروستبووە، پارێزگاری هەڵەبجەش بەڵێنی چارەسەری گرفتەكە دەدات.

چیرۆكی سەرەكی: بەهۆی لەكاركەوتنی ترۆمپاكانی وێستگەی پرۆژەی ستراتیژی ئاوی (هەڵەبجە - سیروان - سەید سادق)، ماوەی چەند ڕۆژێكە بەشێك لە دانیشتووانی سنووری پارێزگای هەڵەبجە و قەزای سەید سادق، دووچاری گرفتی كەمئاوی بوونەتەوە.

ڕاگەیێنراوی فەرمی: نوخشە ناسیح، پارێزگاری هەڵەبجە، لەمیانی بەسەركردنەوەی مەیدانی گرفتی تەكنیكی پرۆژەی ستراتیژی ئاوی هەڵەبجە - سیروان - سەیدسادق، بەڵێنی گرتنەبەری ڕێوشوێنی پێویستی دا بۆ چارەسەركردنی كێشەكە لە نزیكترین كاتدا، ئەوەش بە هەماهەنگی لەگەڵ بەڕێوەبەرایەتی ئاوی پارێزگای هەڵەبجە.

ئەوەش بزانە: پارێزگاری هەڵەبجە سوپاس و پێزانینی ئاڕاستەی فەرمانبەر و كارمەندانی بەڕێوەبردنی پڕۆژەی ئاوی هەڵەبجە - سیروان- سەیدسادق كرد، بۆ ماندوبوونی بەردەوامیان لەپێناو گەیاندنی ئاوی خاوێن بۆ هاووڵاتیانی پارێزگاكە.