کەسێک لە مێرگەسۆر لە کاتی مەلەکردن خنکا

ئاڤا نیوز

 

ئەمڕۆ لە سنووری قەزای مێرگەسۆر کەسێک لە کاتی مەلەوانی خنکاوە و تیمەکانی بەرگریی شارستانی بەدوای تەرمەکەیدا دەگەڕێن.

 

چیرۆکی سەرەکی: دوای کاتژمێر 11ی ئەمڕۆ شەممە 2/8/2025، گەشتیارێکی دانیشتووی هەولێر کە بەمەبەستی گەشت و سەیران سەردانی سنووری قەزای مێرگەسۆری کردبوو، لە گوندی دڵانی دەڤەری بارزان لە کاتی مەلەوانی خنکا.

 

لێدوانی فەرمی: ڕەوەند هاودیانی، وتەبێژی بەرگریی شارستانیی ئیدارەی سەربەخۆی سۆران بە ئاڤای گوت، کەسێکی تەمەن 29 ساڵ کە دانیشتووی شاری هەولێرە، خێزاندارە و سێ منداڵی هەیە و ڕووی لە سنووری بارزان کردووە، لە نزیک گوندی دڵان لە ئاودا خنکاوە. تییمەکانمان بە سەرپەرشتیی بەرێوەبەری بەشی بەرگریی شارستانیی قەزای مێرگەسۆر و تیمەکانی مەلەوانیی سنووری قەزای سۆران بەدوای تەرمەکەیدا دەگەڕێن.

 

ئەوەی پێویستە بیزانیت: زۆربەی زێ و ڕووبارەکانی سنووری ئیدارەی سەربەخۆی سۆران بەهۆی قوڵی و ساردی و خێرایی ئاوەکەیان، بۆ مەلەوانی گونجاو نین و بە هەرسێ زمانی کوردی، عەرەبی و ئینگلیزی تابلۆی ئاگادار کردنەوە لە نزیکیانەوە دانراوە.

 

باکگراوند: ئەمساڵ شەش ڕووداوی خنکان لە سنووری ئیدارەی سەربەخۆی سۆران ڕوویانداوە.