تەرمی کۆچبەرێکی کورد دەگەڕێنرێتەوە هەرێمی کوردستان

ئاڤا نیوز

کۆچبەرێکی کورد لەڕێگەی گەیشتن بە کەناراوەکانی ئیتاڵیا و ئەوروپا گیانلەدەست دەدات و تەرمەکەی دەگەڕێنرێتەوە هەرێمی کوردستان.

وێنە گەورەکە: بەشێک لە گەنجانی ناوچە جیاوازەکانی هەرێمی کوردستان و وڵاتانی دیکەی ناوچەکە، بۆ گەیشتن بە کەناراوەکانی ئیتاڵیا ڕێگەی نایاسایی بەکاردەهێنن، هەندێکجار لەلایەن هێزە ئەمنییەکانەوە دەستگیر دەکرێن و دەخرێنەوە زیندانەوە، هەندێکجاریش تووشی ڕووداوی نەخوازراو دەبنەوە و گیانلەدەست دەدەن.

لێدوانی فەرمی: د. موسەننا ئەمین، ئەندامی لیژنەی پەیوەندییەکانی دەرەوەی پەرلەمانی عێراق بە ئاڤای ڕاگەیاند: ئەو گەنجە ناوی “کەیوان فایەق محەممەد”ـە، لەڕێگەی گەیشتن بە ئیتاڵیا تووشی ڕووداوێکی نەخوازراوە بووە و سەری بەر ئاسنێک کەوتووە، بەمەش بە سەختی بریندار بووە و ڕەوانەی نەخۆشخانەیەک کراوە لە دوورگەی پالێرمۆی ئیتاڵیا.

زانیاریی زیاتر: گەنجەکە لە دایکبووی 20-5-1998ـە، خەڵکی سنووری سلێمانییە، دوای خەواندن و مانەوەی لەژێر چاودێریی چڕی پزیشکی لە نەخۆشخانە، گەنجەکە گیانی لەدەستداوە.

ئەوەی پێشبینی دەکرێت: لەبەر ئەوەی گەنجەکە لە نەخۆشخانەیەکی دوورگەی پالێرمۆ خەوێندراوە، ئەوا دەبێت لە وڵاتانی لیبیا و تونس هەوڵی گەیشتنی بە کەناراوەکانی ئیتاڵیا دابێت.