بۆ زیادکردنی داهاتی نانەوتی.. عێراق ڕێکارە گومرگییەکان و حەواڵەی دەرەکی ڕێک دەخاتەوە

ئاڤا نیوز

دەستەی گشتیی گومرگی عێراق پاکێجێک ڕێکاری ڕێکخستنی نوێی ڕاگەیاند کە لەلایەن ئەنجوومەنی وەزیرانەوە لە دانیشتنی ڕۆژی 22ـی تەمموزی 2025دا پەسەند کراوە.

بۆچی گرنگە: ئامانج لەم ڕێکارانە ئاسانکردنی میکانیزمەکانی حەواڵەی دەرەکییە بۆ هاوردەکردنی کاڵا، زیادکردنی داهاتە نانەوتییەکان و بەهێزکردنی چاودێری بەسەر پرۆسە گومرگییەکاندا.

ڕاگەیێنراوی فەرمی: بەگوێرەی ڕاگەیێنراوی دەستەکە، بەپێی ڕێکارە نوێیەکان، هەر حەواڵەیەکی دەرەکی بۆ هاوردەکردنی کاڵا مەرجدار کراوە بە پێشکەشکردنی "بەیاننامەی گومرگیی پێشوەختە" بە بانکەکان کە دەبێت کۆدی QRی لەسەر بێت و ژمارەکەشی لە سیستمی سویفتدا تۆمار بکرێت.

- بۆ ڕێگریکردن لە هەر گزییەک، ئەگەر کاڵای هاوردەکراو لە ماوەی شەش مانگدا نەگات، دەستەی گومرگ بانکەکان و بانکی ناوەندی ئاگادار دەکاتەوە بۆ لێپرسینەوە لە هاوردەکار. هەروەها، دوای دەرکردنی بەیاننامەکە و ئەنجامدانی حەواڵەکە، گۆڕینی هەر زانیارییەک، وەک ناوی بانک یان ناوەڕۆکی بەیاننامەکە، بە تووندی قەدەغە کراوە.

ئەوەی پێویستە بیزانیت: کارکردن بەم بڕیارە لە 1ی کانوونی یەکەمی 2025ـەوە دەست پێدەکات و هەموو ئەو ڕێنماییەی پێشوو هەڵدەوەشێنێتەوە کە لەگەڵ ناوەڕۆکەکەیدا ناکۆکن.