عێراق لە مانگی ڕابردوودا زیاتر لە 8 ملیۆن بەرمیل نەوتی هەناردەی ئەمریکا کردووە

ئاڤا نیوز

ئیدارەی زانیاریی وزەی ئەمریکا ڕایدەگەیێنێت، هەناردەی نەوتی خاوی عێراق بۆ ئەمریکا لە مانگی تەمموزی ڕابردوودا زیاتر لە 8 ملیۆن بەرمیلی تێپەڕاندووە.

ئەوەی پێویستە بیزانیت: عێراق لە پلەی چوارەمی گەورەترین هەناردەکارانی نەوتدا بووە بۆ ئەمریکا لە مانگی تەمموزدا، لە دوای کەنەدا، سعوودیە و مەکسیک.

بڵاوکراوەی فەرمی: ئیدارەکە لە خشتەیەکدا، باسی لەوە کردووە کە عێراق لە مانگی تەمموزدا 8 ملیۆن و 370 هەزار بەرمیل نەوتی هەناردەی ئەمریکا کردووە، ئەمەش بەرزبوونەوەیەکە بە بەراورد بە 6 ملیۆن و 433 هەزار بەرمیل لە مانگی حوزەیرانی پێشوودا.

ژمارەکان وادەڵێن: عێراق بە تێکڕای ڕۆژانە 314 هەزار بەرمیلی لە هەفتەی یەکەمی تەمموزدا هەناردە کردووە، دواتر 273 هەزار بەرمیل لە هەفتەی دووەم، 214 هەزار بەرمیل لە هەفتەی سێیەمدا و پاشان ڕێژەکە بۆ 279 هەزار بەرمیل لە هەفتەی چوارەمدا بەرزبووەتەوە.

لەهەمان کاتدا: بەگوێرەی ڕاپۆرتەکە، لەسەر ئاستی وڵاتانی عەرەبی، عێراق پلەی دووەمی گرتووە لە دوای سعوودیە کە 9 ملیۆن و 393 هەزار بەرمیلی هەناردە کردووە، لە کاتێکدا لیبیا بە هەناردەکردنی یەک ملیۆن و 488 هەزار بەرمیل لە پلەی سێیەمدا هاتووە.