سکاڵایەکی دیکە لەسەر شاسوار عەبدولواحید تۆمار دەکرێت و ئاسایش داوای دەکات

ئاڤا نیوز

ئەگەرچی ئێستا لە زیندانە بە تۆمەتی هەڕەشەکردن، ئاسایشی سلێمانی داوای سەرۆکی جووڵانەوەی نەوەی نوێ دەکات لەدوای تەواوبوونی کارەکانی لە دادگا، چونکە داوایەکی دیکەی لەسەرە.

چیرۆکی سەرەکی: شەوی سێشەممە لەسەر داوای پەرلەمانتارێکی پێشووی خۆی، بە تۆمەتی هەڕەشەکردن لەسەر بڵاوکردنەوەی وێنە و ڤیدیۆی نەشیاو، هێزە ئەمنییەکانی سلێمانی شاسوار عەبدولواحیدی دەستگیر کرد و ئێستا لە زیندانە.

لێدوانی فەرمی: بەشدار حوسێن، یەکێک لە پارێزەرەکانی شاسوار عەبدولواحید بە ئاڤای وت، ئاسایشی سلێمانی داوای لە دادگا کردووە، دوای تەواوبوونی ڕێکارە یاساییەکان لەگەڵ شاسوار عەبدولواحید، بە دەستبەسەرکراوی ڕادەستی ئێمەی بکەن، چونکە داوایەکی دیکەی لەسەر تۆمار کراوە.

زانیاریی زیاتر: بەگوتەی پارێزەرەکە، سکاڵای دووەم کە لەسەر ناوبراو تۆمارکراوە بریتییە لە خراپ بەکارهێنانی ئامێرەکانی پەیوەندی، کە لە ساڵی ڕابردوو لەسەری تۆمار کراوە و فەرمانی گرتنی لەلایەن ئاسایشی سلێمانییەوە هەیە.