جێگری سەرۆکی پەرلەمانی عێراق لەسەر كێشەی دەرچووانی زانكۆی گەرمیان دێتە دەنگ

ئاڤا نیوز

بە نووسراوێکی فەرمی، د.شاخەوان عەبدوڵڵا داوا لە وەزارەتی خوێندنی باڵای فیدراڵ دەكات، دادپەروەری بەرامبەر دەرچووانی زانكۆی گەرمیان لە خانەقین و ناوچە كوردستانییەكانی دیكەی دەرەوەی ئیدارەی هەرێمی كوردستان بنوێنێت و داواكارییەكانیان جێبەجێ بكات.

چیرۆكی سەرەكی: سێ كۆلێژی خانەقین، تا ئێستا لەڕووی یاساییەوە گرفتیان هەیە و هەڕەشەی مەرجە سەپێنراوەكانی بەعقوبە و بەغدا بۆ قەدەغەكردنی خوێندن بە زمانی كوردییان لەسەرە، قوتابیانی ئەو كۆلێژانەش دژی ئەم مەرجانە، مانیان گرتووە و بڕیاریان داوە تا داواكارییەكانیان جێبەجێ نەكرێت، دەست لە مانگرتن هەڵناگرن.

چی ڕوویدا: دوای سەردانە مەیدانییەكەی بۆ لای قوتابییە ناڕازییەكان و دەرچووانی زانكۆی گەرمیان لە خانەقین و لەنزیكەوە گوێگرتن لە داواكارییەكانیان، د. شاخەوان عەبدوڵڵا، جێگری سەرۆکی ئەنجوومەنی نوێنەرانی عێراق، نووسراوێكی ئاراستەی وەزیری خوێندنی باڵا و توێژینەوەی زانستیی حکومەتی فیدراڵ کرد، تێیدا داوایكردووە بەرامبەر دەرچووانی زانكۆكە و تەواوی دەرچووانی دیكەی ناوچە كوردستانییەكان دادپەوەر بێت و دان بە بڕوانامەكانیان بنێت و دەرفەتی كاری یەكسانیان بۆ دابین بكات.

نووسراوی فەرمی: لە نووسراوەكەدا، جێگری سەرۆكی ئەنجوومەنی نوێنەرانی عێراق داوایكردووە، لە چوارچێوەی ئەو حەوت هەزار پلە وەزیفیەی كە بۆ پارێزگای دیالە تەرخانكراوە، دەرچووانی زانكۆی گەرمیان و كۆلێژە كوردییەكانیش، پشكی دامەزراندنیان هەبێت هاوشێوەی هاوتەمەنەكانیان لە دەرچووانی زانكۆكانی دیكەی عێراق.

لەلایەکی دیکەوە: مەلا بەختیار، بەرپرسی باڵای پێشووی یەکێتیی نیشتمانیی کوردستان لە ئەژماری فەرمیی خۆی لە تۆڕە كۆمەڵایەتییەكان، نامەیەكی كراوەی ئاراستەی سەركردە باڵاكانی عێراق و هەرێمی كوردستان كردووە و ئاماژەی بەوە كردووە، "ئەو كێشەیە تەنها بە وەزارەتی خوێندنی باڵا چارەسەر نابێت، بەڵكو پێویستە هەردوو حكومەتی هەرێمی كوردستان و حكومەتی فیدراڵ و فراكیسیۆنە كوردستانییەكانی نێو پەرلەمانی عێراق بێنە سەر هێڵ، هیچ نەبێت تا پرسی ماددەی 140 ساغ دەبێتەوە، دژایەتیی كۆلێژە كوردییەكانی خانەقین نەكرێت، با سەرووی هەزار و 500 خوێندكار و 150 مامۆستا و كارمەند ناكام نەبن."

باكگراوند: خانەقین لە دیارترین ئەو ناوچانەی كوردستانە كە زۆرترین باجی كوردستانیبوونی داوە و لە شۆڕشی ئەیلوولەوە تا ئێستا؛ نزیكەی 700 شەهیدی داوە، هەزار و 672 گوندی ناوچەكە تەختكراون و خەڵكەكەشی بۆ خوارووی عێراق راگوێزراون. هاوکات، 643 گوندی تەعریب كراون و زیاتر لە 800 كەس لە ناوچە جیاجیاكان دەركراون و 67 گوند و گەڕەكی كوردی بە ناوی عەرەبییەوە گۆڕدراون لەگەڵ چەندین پێشێلكاری دیكە.