چوارچێوەی هەماهەنگی بۆ ئاڤا : خامنەیی هیچ پەیوەندی بەیاسای حەشدی شەعبییەوە نییە

ئاڤا نیوز

چوارچێوەی هەماهەنگی،  ئەو دەنگۆیانەی ڕەتکردەوە کە باس لە کشانەوەی یاسای حەشدی شەعبی لەسەر ڕاسپاردەی عەلی خامنەیی، ڕابەری باڵای ئێرانەوە دەکات و دەڵێت "دواخستنی یاساکە پێشنیازی حکومەت بووە بۆ ڕێگریکردن لە زیادبوونی گرژییەکان".

چیرۆکی سەرەکی: دوێنێ یەکشەممە، 31-8-2025 ڕۆژنامەی "عەین"ـی ئیماراتی لە ڕاپۆرتێکدا هۆکارەکانی کشانەوەی پڕۆژە یاسای حەشدی شەعبی خستەڕوو و ئاماژەی بەئەوە دا، وەک وەڵامێک بۆ فشارە نێودەوڵەتی و ئیقلیمییەکان و لەسەر ڕاسپاردەی عەلی خامنەیی، ڕابەری باڵای ئێرانەوە، چوارچێوەی هەماهەنگیی دەسەڵاتدار لە عێراق ناچار بوو پڕۆژەیاسای حەشدی شەعبی لە پەرلەمان بکێشێنێتەوە .

لێدوانی فەرمی: عودەی خەدران، ئەندامی چوارچێوەی هەماهەنگی، کە زۆربەی لایەنە سیاسییە شیعەکانی عێراق لەخۆدەگرێت لە لێدوانێکدا بۆ ئاڤا میدیا ڕایگەیاند: ئەو ڕاپۆرتە میدیاییانەی کە باس لەوە دەکەن خامنەیی پەیامێکی ئاراستەی چوارچێوەی هەماهەنگی کردووە، داوای لێکردووە یاسای حەشدی شەعبی پەسەند نەکرێت، دورە لەڕاستییەوە و هیچ پەیامێکی ڕاستەوخۆ یان ناڕاستەوخۆ لە خامنەییەوە سەبارەت بە یاسای حەشدی شەعبی یان هەر یاسایەکی دیکە بە چوارچێوەی هەماهەنگی نەگەیشتووە .

خەدران ڕوونیشیکردەوە، حەشدی شەعبی دامەزراوەیەکی فەرمی عێراقییە و هەر یاسایەک تایبەت بەم دامەزراوەیە، کارێکی عێراقییە و هیچ دەستێوەردانێکی ئێرانی لەم چوارچێوەیەدا نییە و بڕیارەکە لەلایەن حکومەتەوە بە ڕێککەوتن لەگەڵ سەرکردایەتیی لایەنە سیاسییەکان دراوە، بۆ ڕێگریکردن لە هەر گرژییەک لەم کاتە هەستیارەدا.