ئایدن مەعروف: سەرۆك بارزانی لە هەمووان زیاتر لە خەمی پێكهاتەكاندایە

ئاڤا نیوز

ئەندامێكی مەكتەبی سیاسی بەرەی توركمانی دەڵێت، سەرۆك بارزانی لە هەمووان زیاتر لە خەمی پێكهاتەكاندایە و بەرگری لە مافەکانیان دەکات، داواش دەکات مەرجەکانی پارتی بۆ بەشداریکردن لە هەڵبژاردن جێبەجێ بکرێن.

وێنە گەورەکە: سەرۆک بارزانی لە نوێترین پەیامیدا لەبارەی پرۆسەی هەڵبژاردن، جارێکی دیکە جەختی لە هەڵبژاردنێکی شەفاف و دوور لە دەستوەردانی دەرەکی کردەوە، ڕاشیگەیاند ناكرێت هەڵبژاردن بەبێ بەشداریی پێكهاتەكان بکرێت و پەرلەمانێک پێكبهێنرێت نوێنەری ئەوانی تێدا نەبێت.

لێدوانی فەرمی: لەمبارەیەوە ئایدن مەعروف، ئەندامی مەکتەبی سیاسیی بەرەی تورکمانی بۆ ئاڤا نیوز گوتی: "بڕیارەكانی دادگەی فیدراڵی سیاسین و لەگەڵ جێبەجێكردنی داواكارییەكانی پارتیداین بۆ هەڵبژاردن".

 

لەلایەکی دیکەوە: ئایدن مەعروف ڕۆڵی سەرۆک بارزانی لە پشتیوانیکردنی پێکهاتەکان بەرزنرخاند و گوتی: "لە هەموو كەسێك زیاتر لە كوردستان و عێراقدا خەمی مافی پێكهاتەكان و نەتەوە و ئایینە جیاوازەكانی هەبووە، سوپاسی هەڵوێستەکانی دەکەین و ناکرێت نوێنەری پێکهاتەکان لە پەرلەمانی داهاتوودا نەبێت".