فەرماندەیەکی عێراق: لەگەڵ تورکیا هەماهەنگیمان نییە بۆ هێرشکردنە سەر پەکەکە

ئاڤا نیوز

فەرماندەیەکی باڵای عێراق ڕەتی دەکاتەوە هەماهەنگییان لەگەڵ تورکیا هەبێت بۆ ئۆپەراسیۆن دژی پەکەکە لە هاوینی ئەمساڵدا.

وێنە گەورەکە: تورکیا پلانی هەیە هاوینی ئەمساڵ هێرشێکی فراوان بکاتە سەر پەکەکە، دوای کۆبوونەوەی لووتکەی نێوان بەغدا و ئەنقەرەش کە نێوەڕاستی ئەم مانگە لە بەغدا کرا، هەواڵی ئەوە بڵاوکرایەوە تورکیا و عێراق گفتوگۆیان کردووە لەسەر هەماهەنگی فراوان لە دژی پەکەکە و لەبەرامبەر ڕێککەوتن لەسەر دۆسیەکانی ئاو و وزە، حەشدی شەعبییش ڕۆڵی دەبێت لە ئۆپەراسیۆنەکەدا.

لێدوانی فەرمی: فەریقی یەکەم ڕوکن قەیس محەمەداوی، جێگری فەرماندەی ئۆپەراسیۆنە هاوبەشەکانی عێراق ڕایگەیاندووە، هەماهەنگی لەگەڵ ئەنقەرە تایبەتە بە هاوبەشییە ئەمنی و سیاسی و ئابووری و ئاوییەکانەوە. ئاماژەی بۆ ئەوەش کردووە سوپای عێراق زیاتر لە 20 خاڵی سەربازی لەسەر سنووری تورکیا و عێراق داناون.

زانیاریی زیاتر: بەغدا ڕژدە لە چارەسەرکردنی نیگەرانییەکانی تورکیا و بوونی پەکەکە لەسەر سنوورەکانی، عێراق هەوڵدەدات هاوشێوەی ئەو ڕێککەوتنە ئەمنیەی لەگەڵ ئێران کردی لەگەڵ تورکیاش بیکات بۆ کۆنترۆڵکردنی سنوورەکان. قەیس محەمەداوی وادەڵێت.