تەندروستیی کەربەلا: ئەو ئاوەی بەسەر ماڵاندا دابەش دەکرێت خاوێن و تەندروست نییە

ئاڤا نیوز

بەڕێوەبەرایەتیی تەندروستیی کەربەلا دەڵێت: ئەو ئاوەی بەسەر ماڵاندا دابەشدەکرێت جۆرێک بەکتریای تێدایە و خاوێن و سازگار نییە؛ هۆشداریی دەداتە هاووڵاتییان لە بەکارهێنانی.

وێنە گەورەکە: کەمبوونەوەی سەرچاوەکانی ئاو لە پارێزگاکانی عێراق و تێکەڵبوونی لەگەڵ ئاوی قورس لە هەندێک شوێندا، کوالێتییەکەی تێکداوە و وایکردووە جگە لە هەندێک پێداویستی، زۆرکات بۆ خواردنەوە و خواردن ئامادە کردن کەڵکی لێوەرنەگیرێت.

نووسراوی فەرمی: بەڕێوەبەرایەتیی تەندروستیی کەربەلا لە نووسراوێکدا کە ئاڕاستەی تەندروستیی گشتیی پارێزگاکەی کردووە، ئەوەشی خستووەتەڕوو، لەسەر بنەمای سکاڵای هاووڵاتییان بەدواداچوونیان بۆ ئاوی پارێزگاکە کردووە و لە چەند شوێنێکی جیاواز نمونەی پشکنینی ئاویان وەرگرتووە، لە ئەنجامیشدا بۆیان دەرکەوتووە ئەو ئاوەی دابەشدەکرێت جۆرێکی بەکتریای لەگەڵ دایە، جگەلەوەش ئاوێکی سازگار نییە.

بەڕێوەبەرایەتیی تەندروستیی کەربەلا دواتر لە ڕوونکردنەوەیەکی دیکەدا ڕایگەیاند، ئاوی ماڵان لە پارێزگاکەدا پاک و خاوێنە و گرفتی نییە، بۆ لێکۆڵینەوەش لە زیانەکانی ئەو ماددانەی لە نووسراوەکەدا باسکراون، لیژنەی بەدواداچوون پێکهێنراوە.