کۆنگرێسمانێکی ئەمریکی داوای پشتیوانیی زیاتر بۆ هەرێمی کوردستان دەکات

ئاڤا نیوز

کۆنگرێسمانێكی ئەمریکی هەمواردنەوەی یاسایەک لە سوودی کورد پێشکەش دەکات و داوای پشتیوانیی زیاتر بۆ هەرێمی کوردستان دەکات.

وێنە گەورەکە: ئەمریکا هەرێمی کوردستان وەک هاوبەشێکی خۆی لەناوچەکەدا دەبینێت و پشتیوانی لێ دەکات بەرامبەر بەو هەڕەشە و گوشارانەی لەسەری هەیە.

ڕاگەیێنراوی فەرمی: جۆی ویڵسن، ئەندامی کۆنگرێسی ئەمریکا، هەموارکردنەوەی یاسایەک پێشکەش دەکات کە بە هۆیەوە پاڵپشتیی تەواوەتی بۆ هەرێمی کوردستان دابین دەکرێت.

بە گوێرەی هەموارەکە، کۆنگرێس دان بەوەدا دەنێت کە هەرێمی کوردستان هاوبەشێکی ستراتیژیی و گرنگی ئەمریکایە و پێویستە ئەمریکا و عێراق دڵنیا ببنەوە لەوەی سەقامگیر بێت و هەروەها مووچەی فەرمانبەران و شایستە داراییەکانی بدرێت.

هاوکات، هەرێمی کوردستان بتوانێت پەرە بە تواناکانی بەرهەمهێنان و هەناردەکردنی نەوت بدات و لە هێرش و پەلاماری میلیشیاکانی سەر بە حکومەتی عێراق پارێزراو بێت. 

هەروەها داوا دەکات، ئەمریکا پشتیوانیی ئەمنی بۆ هەرێمی کوردستان دابین بکات بە جۆرێک کە بتوانێت لە بەرامبەر هێرشەکانی ئێران و میلیشیاکانی سەر بە ئێران بەرگریی لە خۆی و لە سەرچاوەکانی وزەی بکات.