لە نەخۆشخانەی ڕزگاریی هەولێر کێشە بۆ نەخۆشێک دروست دەکرێت؛ لایەنی کەمتەرخەم سزا دەدرێت

ئاڤا نیوز

دوای ئەوەی ئەمڕۆ نەخۆشێک بەمەبەستی وەرگرتنی چارەسەر دەچێت بۆ نەخۆشخانەی ڕزگاری، گرفتی بۆ دروست دەکرێت و نەشتەرگەرییەکەی بۆ ناکرێت، بەڕێوەبەری کارگێڕی نەخۆشخانەکە دەڵێت، "بەدواداچوون بۆ کێشەکەی دەکەین و لایەنی کەمتەرخەم سزا دەدەین".

چیرۆکی سەرەکی: ڕۆژی 6-9-2025، پیاوێک بە مەبەستی ئەنجامدانی نەشتەرگەری سەردانی نەخۆشخانەی ڕزگاری لە هەولێر دەکات، وەک خۆی دەڵێت، "لە بەشی ئێسک پێیان وتووە بچۆرە بەشی جومگە و لەوێ چارەسەرت دەکەن کە چوومە بەشی جوومگە وەک هەر نەخۆشێکی دیکە نۆرەم گرت تا دکتۆرەکەم دیت، دواتر پێیان وتم بچۆرە بەشی ئێسک و لێرە هیچت بۆ ناکرێت، لە دواییدا نەشتەرگەرییەکەم بۆ نەکرا و گەڕامەوە ماڵەوە، داواکارم بەدواداچوون بۆ ئەم بابەتە بکرێت و چیتر ئەزیەتی نەخۆش نەدرێت".

لێدوانی فەرمی: سەعد کەمال، بەڕێوەبەری کارگێڕیی نەخۆشخانەی ڕزگاری بە ئاڤا میدیای ڕاگەیاند: ئاگاداری بابەتەکەین و لەڕێگەی بەشی ڕاگەیاندنیانەوە پەیوەندیمان بە نەخۆشەکەوە کردووە، بە نەخۆش وتراوە وردەکارییەکانمان پێ بڵێت، تاوەکو سزای لایەنی کەمتەرخەم بدرێت.

بەڕێوەبەری کارگێڕی نەخۆشخانەکە دەڵێت: کاتێک پەیوەندی بە نەخۆشەکەوە کراوە، پێی وتین ''پەیوەندییەکەتان بۆ من دڵنەواییە''، ئێمەش ئامادەیمان بۆ بەدواداچوون لەسەر کەیسەکەی و گەڕانەوەی مافی ئەو کرد، بەڵام نەخۆشەکە ئامادەنەبوو لەسەر بابەتەکە بڕوات و وازی لێهێنا.

ئەوەی پێویستە بیزانیت: ڕۆژانە سەدان نەشتەرگەری جۆراوجۆر لە نەخۆشخانەی ڕزگاری دەکرێت، هەروەها 10 بۆ 13 هەزار نەخۆشیش سەردانی نەخۆشخانەکە دەکەن.