بەشێک لە هاووڵاتیانی ئەمریکا گرفتی گرژبوونی کۆڵۆن "‌قۆڵۆن"یان هەیە

ئاڤا نیوز

گرژبوونی قۆڵۆن هەرچەندە نەخۆشی نییە، بەڵکو حاڵەتێکی فزیکییە لە نێوان تەندروستی و نەخۆشییدایە، کەسی تووشبوو هەست بە ناڕەحتی، سکچوون یان قەبزی، و زیادبوونی هەوای گەدە دەکات، ئێستا بەشێک لە هاوڵاتییانی ئەمریکا تووشی ئەم گرفتە بوون. 

زانیاریی زیاتر: بەشێک لەو نیشانانەی کە لە کەسی تووشبوودا هەیە؛ ژانە سک، زیادبوونی هەوای گەدە و هەستکردنە بە زیادبوونی قەبارەی گەدە، زۆرکاتیش کەسەکە تووشی سکچوون یان قەبزی دەبێت.

 ئەوەی پێویستە بیزانیت: پزیشکانی پسپۆڕ ڕێنمای خەڵکی دەکەن گەر هاتوو کەسێک هەستی بە لاوازی و بێهێزی کرد یاخود خوێن لەگەڵ پاشەڕۆیدا هەبوو و لە شەوان تووشی سکئێشەی بەردەوام بوو، ئەوا پێویستە کەسەکە بەزووترین کات سەردانی پزیشکی پسپۆڕ بکات بۆ وەرگرتنی چارەسەر. 

بڵاوکراوەی فەرمی: توێژینەوەیەکی نوێی پزیشکی باسی لەوەکردووە، 20% خەڵکی ئەمریکا تووشی ئەم گرفتە دەبن، هۆکارەکەشی گەڕاندووەتەوە بۆ زیادبوونی خەمۆکی، دڵەڕاوکێ، زیادبوونی فشاری دەروونی، هاوکات باس لەوەشکراوە خانمان دووجار زیاتر ئەگەری تووشبوونیان بەم دۆخە هەیە. 

چارەسەرەکان: توێژەران ئاماژەیان بەوەداوە کە دەکرێت بە کەمکردنەوەی خواردنەوە گازییەکان و نەخواردنی پاقلەمەنییەکان و زیادکردنی خۆراکە ڕیشاڵییەکان تا ڕادەیەکی زۆر باش ئەم گرفتە کۆنترۆڵ بکرێت. هاوکات کەمکردنەوەی فشاری دەروونی و وەرزشکردنیش یەکێکی دیکەیە لە ڕێگە کاریگەرەکان.