د. سامان بەرزنجی: بەڵێنمان وەرگرتووە پارەی دەرمان بۆ نەخۆشخانەكانی سلێمانی دابین بكرێت

ئاڤا نیوز

وەزیری تەندروستیی هەرێمی كوردستان ڕایدەگەیەنێت، وەزیری دارایی و ئابووری بەڵێنی داوە، پارەی كاش بۆ كڕینی دەرمانی پێویست دابین بكات.

وێنە گەورەكە: سەرەڕای تەرخانكردنی بڕی 27 ملیار دینار بۆ كڕینی دەرمان و پێداویستی پزیشكیی یەك ساڵی نەخۆشخانە و بنكە تەندروستییەكانی پارێزگای سلێمانی، كەچی بەشێكی زۆر لە نەخۆشخانەكان كێشەی كەمی دەرمان و نەبوونی چەند چارەسەرییەكی پێویستیان بۆ دروستبووە و، بەهۆیەوە گرفت بۆ ڕاییكردنی ئەركەكان دروستبووە.

لێدوانی فەرمی: د. سامان بەرزنجی، وەزیری تەندروستی حكومەتی هەرێمی كوردستان لە لێدوانێكی بۆ دەزگاكانی ڕاگەیاندن ئاماژەی بەوەكرد، لە كۆبوونەوەی ئەنجوومەنی وەزیران، لەگەڵ وەزیری دارایی و ئابووری قسەم كردووە و بەڵێنی داوە، خەرجی پێویست بۆ كڕینی دەرمان دابین بكرێت.

وەزیری تەندروستی وتیشی، داوامان كردووە، خەرجی كڕینی پێداویستییەكانی نەخۆشخانە و بنكە تەندروستییەكان، لە ڕێكارە كارگێڕییە ئاساییەكانی جووڵەی كاش، هەڵاوێر (استثناء) بكرێت، لەپێناو ئەوەی گرفت بۆ كەمبوونەوە یاخود نەمانی دەرمان و پێداویستییەكانی نەخۆشخانە دروست نەبێت.

زانیاریی زیاتر: وەزیری تەندروستی ئاماژەی بەوەشكرد، بەشێك لە كێشەی كەمبوونەوە و نەمانی دەرمان پەیوەندیی بەوەوە هەیە كە كۆمپانیاكانی هاوردەكردنی دەرمان (ئەوانەی گرێبەستیان هەیە) وەك پێویست پابەندی هێنانی دەرمان نابن و، پێویستە پابەند بكرێن بە دابینكردنی دەرمان بۆ نەخۆشخانەكان.