پارێزگای کەرکووک ڕوونکردنەوە لەبارەی دزەپێکردنی داتاکانی دەدات

ئاڤا نیوز

سەنتەری نیشتمانی ئاسایشی ئەلیکترۆنیی پارێزگای کەرکووک ڕوونکردنەوە لەبارەی ڕووداوی بردنی داتاکانی پارێزگاکە دەدات کە لەلایەن گرووپێکەوە دزەیپێکرابوو. دەڵێت،  هێرشەکانی گرووپە نایاساییەکان زیانێکی ئەوتۆیان بە سیستمی سەرەکی ئۆپەراسیۆنی وەزارەتەکان یان دامەزراوە حکومییەکان نەگەیاندووە.

ڕاگەیێنراوی فەرمی: لە ڕاگەیێنراوێکدا سەنتەرەکە ڕایگەیاند: لە ژێر ڕۆشنایی ئەو هەواڵانەی باس لە هێرشە ئەلیکترۆنیەکان دەکەن کە بەشێک لە ماڵپەڕە عێراقییەکان دەکەنە ئامانج دەمانەوێت ئەمانەی خوارەوە بۆ ڕای گشتی ڕوون بکەینەوە:

٠ سەنتەری نیشتمانی ئاسایشی ئەلیکترۆنی بە هەماهەنگی لەگەڵ پارێزگای کەرکوک و دەزگا پەیوەندیدارەکانی حکومەت توانی هەوڵەکانی هاککردن پووچەڵ بکاتەوە و کاریگەرییەکانیان بە تەواوی ڕابگرێت.

٠ دزەپێکردنی داتا ڕاپۆرتکراوەکان تەنیا داتا کۆنەکان بوون و هیچ بەهایەکی کارکردنیان نەبوو.

٠ دووپاتی دەکەینەوە هەماهەنگی لە ئاستە بەرزەکاندا بەردەوامە بۆ گرتنەبەری هەموو ڕێوشوێنێکی ئەمنی و یاسایی بەرامبەر لایەنە بەرپرسەکان.

٠ داوا لە هەموو دەزگاکانی ڕاگەیاندن دەکەین وردبین و بەرپرسیار بن لە ڕووماڵکردنی هەواڵی ئاسایشی ئەلیکترۆنیدا، بە تەنیا پشت بە لێدوانە فەرمییەکان ببەستن.