دەست بە ڕێکارەکانی دابەشکردنی زەوی دەکرێت

ئاڤا نیوز

دەست بە ئامادەکاری دەکرێت بۆ دابەشکردنی زەوی بەسەر فەرمانبەران، وەزیری شارەوانیش دەڵێت سەرجەم فەرمانبەرانی هەمیشەیی مەدەنی و سەربازی سوودمەندنەبوو دەگرێتەوە.

 

وێنە گەورەکە: دوای 18 ساڵ ڕاگرتنی دابەشکردنی زەوی بەسەر فەرمانبەران، سەرۆکوەزیران مەسرور بارزانی هەفتەی ڕابردوو بڕیاری دا دەست بە پرۆسە بکرێتەوە.

لێدوانی فەرمی: ساسان عەونی، وەزیری شارەوانی و گەشتوگوزار لە چاوپێکەوتنێکدا لەگەڵ ڕۆژان ئەبوبەکر، پێشکەشکاری بەناوبانگی ئاڤا میدیا کە ئەمشەو بڵاودەکرێتەوە، ڕایگەیاند دەستیان بە ئامادەکاری کردووە و ئەم سێشەممەیە یەکەم کۆبوونەوە دەکرێت، پرۆسەکەش شەش بۆ هەشت مانگ دەخایەنێت.

 

ژمارەکان وادەڵێن: بەپێی دوایین ئامار لە هەرێمی کوردستان 697 هەزار و 190 فەرمانبەری هەمیشەیی و 31 هەزار و 698 فەرمانبەری گرێبەست هەیە.

بۆچی گرنگە: بڕیارەکە نزیکەی 30%ی فەرمانبەران (نزیکەی 200 هەزار کەس) دەگرێتەوە و لە سنووری جوگرافی کارکردنیان زەوییان پێدەدرێت.

ئەوەی پێویستە بیزانیت: مەرجی سەرەکی ئەوەیە پێشتر فەرمانبەر لە وەرگرتنی زەوی و یەکەی نیشتەجێبوون سوودمەند نەبووبێت، لە ئایندەیەکی نزیکیش مەرجەکانی دیکە دیاری دەکرێن. بۆ فەرمانبەرانی گرێبەستیش دواتر بڕیاری لەبارەوە دەدرێت.