دەوڵەت باخچەلی: ئەگەر بەدەستم بێت بە نیو کاتژمێر تەواوی سۆشیال میدیا دادەخەم

ئاڤا نیوز

سەرۆکی مەهەپە دەڵێت، پێویستە سۆشیال میدیا بنبڕبکرێت و ئەگەر بەدەست من بێت بە نیو کاتژمێر تەواوی سۆشیال میدیا دادەخەم، هەروەها داوا دەکات ئەحمەد تورک وەک سەرۆکی گەورە شارەوانی مێردین بگەڕێنرێتەوە سەر کارەکەی، سەبارەت بە سەرۆکایەتی ئەردۆغانیش دەڵێت، ڕەجەب تەیب ئەردۆغان، تاوەکو ساڵی 2028 سەرۆککۆماری تورکیایە.

چیرۆکی سەرەکی: بەهۆی نانەوەی ئاژاوە، دەوڵەت باخچەلی، سەرۆکی مەهەپە ، پێشنیاز دەکات کە سۆشیال میدیا بە سەرجەم پلاتفۆڕمەکانی لە تورکیا بنبڕبکرێت.

لێدوانی فەرمی: باخچەلی سەبارەت بە ئەردۆغان گوتی: ئەردۆغان بۆ من لە دۆستێک و هاوڕێیەک زۆر زیاترە، لە داهاتوودا دۆخەکە هەر چۆنێک بێت، من لەگەڵ ئەوەم ئەردۆغان وەک سەرۆککۆمار تا ساڵی 2028 بەردەوام دەبێت، هەروەها پێویستە بۆ هەڵبژاردنەکانی 2028 ـیش وەک کاندید دیاری بکرێت.

لەپاڵ ئەوەشدا: باخچەلی باسی لە پرۆسەی ئاشتی کرد، تیشکی خستە سەر لێدوانەکانی عەبدوڵڵا ئۆجەلان، ڕێبەری زیندانیکراوی پەکەکە لە 27ـی شوباتدا و گوتی، "پەکەکە هەڵوەشاوەتەوە و چەکەکانی دانراون. بۆیە لە هەر شوێنێک پەکەکە و قەوارە سەر بە یەکەکانی هەبن، دەبێت ملکەچی بڕیارەکەی ئۆجەلان بن".

باخچەلی ئاشتی بە باڵندەیەکی تاکە باڵ دەچوێنێت و دەڵێت "بۆ ئەوەی ئاشتی بەرزبێتەوە، پێویستی بە باڵی دووەم هەیە. ئێستا گەیشتووینەتە ئەو قۆناغەی کە دەبێت مەرجەکانی پێکەوە ژیان جێبەجی بکرێت".

لەلایەکی دیکەوە: سەرۆکی مەهەپە ئاماژەی بەوەدا کە پێویستە ئەحمەد تورک، سەرۆکی پێشووی شارەوانی مێردین بگەڕێنرێتەوە سەر کارەکەی. گوتیشی، "ئەو کەسێکە کە بەشداریی کردووە لە دامەزراندنی دیالۆگ لەگەڵ پەکەکە بۆ دەستەبەرکردنی ئاشتی لە تورکیا، پێویستە بگەڕێنرێتەوە سەر کارەکەی".