لە دێرەزوور پێکدادان لەنێوان هەسەدە و هێزەکانی سەر بە حکومەتی سووریا دروستبوو

ئاڤا نیوز

ئەمڕۆ یەکشەممە لە پارێزگای دێرەزووی ڕۆژهەڵاتی سووریا، شەڕ و پێکدادان لەنێوان هێزەکانی سووریای دیموکرات (هەسەدە) و هێزەکانی سەر بە حکومەتی سووریا دروستبوو، هەسەدە دەڵێت، هێزەکانی دیمەشق ویستوویانە بۆ بەشی ڕۆژهەڵاتی فوڕات بپەڕنەوە.

وێنە گەورەکە: لەگەڵ سستبوونی دانوستانەکانی نێوان دیمەشق و ئیدارەی ڕۆژئاوای کوردستان، ماوەیەکە لە حەلەب و دێرەزوو پێکدادانی پچڕپچڕ لەنێوان هەسەدە و هێزەکانی سەر بە حکومەتی سووریا دروستدەبێت، هەردوولاش یەکتریی بە دەستپێکی گرژییەکان تۆمەتبار دەکەن.

ڕاگەیێنراوی فەرمی: هێزەکانی سووریای دیموکرات (هەسەدە) بڵاویکردەوە، ئەمڕۆ هێزەکانیان لە بەشی ڕۆژهەڵاتی فوڕات لەنزیک پردی عەشارەی شارۆچکەی درنج لە بەشی ڕۆژهەڵاتی دێرەزوو لەلایەن هێزەکانی سەر بە دیمەشق ڕاستەوخۆ هێرشیانکراوەتەسەر، هێرشەکەش لە کاتێکدابووە کە هێزەکانی دیمەشق ئاسانکارییان کردووە بۆ کۆمەڵێک هەڵاتوو و قاچاخچێتی تا لەڕێگەی ڕووباری فورڕاتەوە بپەڕنەوە.

ئاماژەی بەوەشکردووە، هێزەکانیان ڕێکاری پێویستیان بۆ مامەڵەکردن لەگەڵ هێرشەکە گرتووەتەبەر، دیمەشقیش وەک بەرپرسیار لەو هێرشە دەناسێنن کە لە ژێر چەتری هێزەکانی ئەواندا پرۆسەی قاچاخچێتی بەڕێوەدەچێت، کە هۆکارێکی بنەڕەتییە بۆ تێکچوونی ئارامی ناوچەکە.